Accessibility links

якшәмбе, 11 декабрь 2016, Казан вакыты 07:25

Gruziä Abxaziä belän çik buyına ğaskärlär cibärde


Abxaziädä bügen tağın ber tapqır prezident saylawları uzdı. Küpçelege etnik görcilär yäşägän Gali rayoınında qayber saylaw urınnarı milisiä tarafınnan uratıp alınğan, maxsus köçlär saylawçılarnı terkägän qağäzlärne alıp kitkän digän xäbärlär bar. Gali rayon şurası başlığı Ruslan Kişmaria, İnterfax mäğlümat agentlığına, xakimiätlär eşkä qatnaşqaç, tawış birüne däwam itü mömkin buldı, dip belderde. Ämma Abxaziä Üzäk Saylaw Komissiäse başlığı Batal Tabagua, Gali rayonında iminlek köçläreneñ saylawlarğa qatnaşqanın häm bäreleşlär bulğan digän xäbärne kire qaqtı: "Eçke eşlär ministrlığı köçläre barı tik saylaw urınnarında iminlekne tä'min iter öçen cibärelde" dide Üzäk Saylaw Komissiäse başlığı. Gruziä, Abxaziä belän çik buyına tärtip saqlawçıların cibärde. Bügen xökümät aldında çığış yasap, Gruziä premyer-ministrı Zurab Zhvania, Gali rayonı xalqına qarşı nindi dä bulsa çaralar kürelsä – moña cawap qayatarılaçağın belderde. Kiçä Galida bilgesez ber keşe ut açqan. Xakimiätlär, bügen ütkän saylawlar respublikada üktäberneñ 3dä uzğan tawış birüdän soñ tuğan kierenkelekne yomşatır digän ömet belderä. Ul saylawlarda ciñgän oppozisiä namzäte Sergei Bagapş bügen yañadan saylawlarda qatnaşa. Anıñ elekke köndäşe – Raul Xacimba, vise-prezident urınına däğwa itä. Bagapşnıñ bügenge köndäşe – Yakub Lakoba, berençe saylawlarda ul 500 tawış cıyğan ide. Kierenkelek tuğaç Rusiä Abxaziägä iqtisadi çikläwlär belän yanadı, şunnan soñ Bagapş belän Xaximba urtaq ber fikergä kilde.

XS
SM
MD
LG