Accessibility links

чәршәмбе, 7 декабрь 2016, Казан вакыты 19:28

Fändäs Safiullin: Latinnı qaytara almawda bez üzebez ğäyeple


Sişämbe, 11 ğinwar könne, Tatarstanda oyıştırılğan Latin frontınıñ YUNESKO oyışmasına qabul itkän möräcäğäte turında bez sezgä inde xäbär itkän idek. Frontnı oyıştıruçılarnıñ berse – Fändäs Safiullin Azatlıq radiosı tıñlawçıların älege möräcäğätneñ eçtälege belän dä tanıştırıp kitte. Läkin ul haman da kiñ cämäğätçelekkä mäğlüm tügel ide, mäğlümät çaralarında da möräcäğät dönya kürmäde. Nihayät, 13 ğinwarda Latin frontınıñ Koordinatsion Şurası äğzäläre jurnalistlarnı cıyıp, üzläre qabul itkän dokument turında söylädelär. Oçraşuda Şuranıñ 4 wäkile – Fändäs Safiullin, yazuçı Äxät Muşinskiy, Damir İsxaqov häm Färit Urazaev qatnaştılar. Qısqaça möräcäğätneñ eçtälege belän tanıştırğaç, alar jurnalistlarnıñ sorawlarına cawap birergä äzer buluların belderdelär. Läkin mäğlümät çaraları wäkilläre, döresräge jurnalist Lev Ovrutskiy, soraw ğına birep qalmadı. UL sişämbe qabul itelgän möräcäğätneñ xoquqı yaqtan döres yazılmağanı häm mondıy dokumentnıñ xalıqara oyışmada bötenläy dä qaralmasqa mömkinlege turında äytte. Front wäkilläre, Ovrutskiyğa räxmätlär äytep, möräcäğätne ingliz telenä tärcemä itkändä bu xoquqı neçkäleklärne iskä alaçaqları turında belderdelär.

Sorawlarnıñ bersenä cawap birep, Fändäs Safiullin bez latinda yazu-yazmaw mömkinlegen yaqlamıybız, bez tatar xalqınıñ xoquqların yaqlıybız, dip belderde. Şuña da, älegä front eşçänlegeneñ näticäse kürenmäsä dä, xäräkät tuqtatılmasqa tieş, dip belderde. Damir İsxaqov isä, Tatarstan parlamentınıñ alar qabul itkän qanunnı beterügä bernindi dä mönäsäbät kürsätmäwe säyer, dide. Gärçä, älege qanun respublika prokurorı möräcäğäte nigezendä Yuğarı mäxkämä tarafınnan inde ğämäldän çığarılğan bulsa da. Matbuğat oçraşuınıñ axırında Fändäs Safiullin tatar telen latin imlasına qaytaru da kilep çıqqan qıyınlıqlarda bez berençe çiratta üzebez ğäyeple, dip belderde.

Şulay itep, Latin frontınıñ Koordinatsion Şurası nihayät üzeneñ eşçänlege turında tulıraq mäğlümät birde. Anıñ ğämälläre belän bez sezne kiläçäktä dä tanıştırıp torırbız.

Gölnaz İlgizär

XS
SM
MD
LG