Accessibility links

якшәмбе, 4 декабрь 2016, Казан вакыты 03:01

Rusiäneñ Süriä belän xärbi xezmättäşlege İzrail wä Quşma Ştatlarnı poşmanğa sala


İzrail häm Rusiädäge qayber mäğlümat çaralarınıñ Mäskäw Süriägä zenit raketaları satu turında söyläşülär alıp bara dip xäbär itüe, İzraildä dä, anıñ yaqın berektäşe Quşma Ştatlarda da zur borçıluğa säbäp buldı. Läkin räsmi säfär belän Washingtonda yörgän Sergey İvanov, Rusiäneñ saqlanu ministrı, andıy söyläşülär baruın bötenläy kire qaqtı.

Rusiäneñ Süriägä şartlı räweştä "İskändär-Export" dip atalğan zamança raketalar satarğa cıyınuı, bu xaqta inde söyläşülär baruı turında berençe bulıp "Kommersant" basması yazıp çıqtı. Şunnan soñ inde bu xäbär İzraildäge mäğlümat çaralarına taraldı, andağı İkençe telekanal, mäsälän, şuşı söyläşülär üzägendä başqa törleräk qoral - küçermäle, cilkädän atarlıq zenit raketaları turında bara, bu Süriäneñ soñğı yıllardağı iñ külämle qoral satıp aluı bulaçaq dip belderde. İzrailneñ borçıluı, "İskändär"gä iä bulğan oçraqta Süriäneñ yähüd däwläteneñ zur öleşen utqa tota alaçağı belän añlatıla. Rusiäneñ Süriägä zamança qoral satarğa cıyınuı xaqındağı şuşı xäbär, saqlanu ministrı Sergey İvanovnıñ Quşma Ştatlarğa kilep, anda yuğarı amerikan citäkçeläre belän oçraşıp yörüe waqıtına turı kilde. Älbättä inde, Mäskäwneñ Dimäşq belän xärbi xezmättäşlege, "Kommersant" bastırğan mäğlümat sürätendä xäbärçelär iğtibarınnan çittä qalmadı. Ämma Sergey İvanov Süriägä raketalar satu turındağı xäbär döreslekkä turı kilmi dip belderde.

Audio, Sergey İvanov

Rusiä saqlanu ministrı şulay uq, şuşı mäs''älä anıñ prezident George Bush häm başqa amerikan citäkçeläre belän söyläşülärendä kütärelmäde dip belderde. Ul şulay uq, andıy kileşügä ireşelgän oçraqta da, Mäskäw bernindi xalıqara kileşüne dä bozmas ide dip östäde.

Audio, Sergey İvanov

"Rusiä tarafınnan üz östenä alğan xalıqara yöklämälär yäisä çikläwlär bu raketalarğa qaramıy, alarnı çit illärgä satu öçen bernindi dä çikläwlär yuq" di Rusiä saqlanu ministrı Sergey İvanov. Şuña da qaramastan, Quşma Ştatlar üzeneñ Mäskäw belän Dimäşq arasında andıy kileşügä ireşüne bik telämäwen äytä. Däwlät departamentınıñ matbuğat wäkile Richard Boucher:

Audio, Richard Boucher

"Bez şul satu turındağı xäbärlärne kürdek. Quşma Ştatlarnıñ bu ölkädäge säyäsäte açıq - bez Süriägä qoral satuğa qarşı, çönki ul il terrornı yaqlawçı däwlät bulıp tora. Şuña kürä dä bez andıy qorallarnı satu urınlı tügel dip isäplibez. Rusiä bezneñ şuşı säyäsätne, bezneñ bu ölkädäge qaraşlarnı belä" di Quşma Ştatlarnıñ däwlät departamentı wäkile. Londondağı "Jane''s defense Weekly" basması öçen eşlägän Robin Hughes, üzeneñ Rusiä Süriägä zamança qoral sata digän xäbärne älegä raslıy almawın äytä:

Audio, Robin Hughes

"Bu xaqta süz Rusiä mäğlümat çaralarında dönya kürde häm ul älegä raslanmağan. Süriä prezidentı Bäşär äl-Asäd kiläse atnalarda Rusiägä barırğa tieş häm anda ul şul raketelarnı alu turındağı kileşüne imzalarğa tieş imeş. Ämma älegä bez monı raslıy almıybız" di Londondağı Yaqın Könçığış belgeçe Robin Hughes. Ul şulay şäxsän üzeneñ, Süriägä taktik raketa sanalğan "İskändär"ne alu bik kiräk tügel, ä menä küçermäle zenit raketalarına iä bulu Dimäşq öçen küpkä qızıqlıraq mömkinlek bulıp tora dip uylawın äytä. Süriäneñ hawadan saqlanu sisteması bügen bik ayanıç xäldä, häm aña İzrailneñ ixtimal hawa höcümnärennän saqlanu öçen andıy zenit qoralı bik urınlı bulır ide digän faraz belderä Hughes. İzrail isä üz yağınnan, ägär dä Süriägä andıy qoral satılsa, anıñ tiz arada könyaq Livandağı "Xezbollah" suğışçıları, xätta Könbatış yardağı fälästin radikalları qulına elägüe bik mömkin dip kisätä.

Kärim Kamal
XS
SM
MD
LG