Accessibility links

пәнҗешәмбе, 8 декабрь 2016, Казан вакыты 07:02

Mäskäwdä "Arkadiä" törek säwdä üzäge açıldı


12 ğinwarda Mäskäwneñ näk üzägendä Mäskäw kremlenä yaqın ber cirdä Zamoskvareçe dip atalğan tarixi urında “Arkadiä” isemle Törek säwdä üzäge açıldı. Bu säwdä üzäge Törkiäneñ säwdä sänäğät assotsiatsiäse tarafınnan tözelgän häm Törkiäneñ Rusiädäge eş üzäge dä şuşında urnaşqan. Törkiäneñ premyer ministrı Räcäp İrduğannıñ Rusiägä säfäre dä şuşı üzäkneñ açılışında turı kiterep eşlängän. Häm “Arkadiä” säwdä üzäge açılır aldınnan Räcäp İrduğan Rusiäneñ prezidentı vladimir Putin belän dä oçraşqan ide. Bu säfärgä İrduğan üze genä kilmägän. Arkadiä säwdä üzäge açılışıına premyer ministr belän bergäläp 600 yaqın eşquarlar da kilgän, alar da 12 ğinwar könne bu açılışta qatnaştılar. Arkadiä säwdä üzäge äytkänemçä Mäskäwneñ iñ tarixı cirlärendä urın alğan ul zamança arxitektura belän tözelgän cide qatlı yort. Läkin ul, Mäskäwneñ älegä tarixi yortları küp bulğan bu töbäkneñ garmoniäsen bozmağan. Bu bina açılır aldınnan xättä ul tarixi yortlarnı da remontlağannar. Şunısı da qızıqlı, mäskäwneñ bu töşe elek elektän tatarlar küpläp yäşägän rayon da. Tatarlarnıñ mädäni märkäze yäğni Asadullaev yortı dip atalğan bina da tramvay belän ber genä tuqtalışta bu töştän. “Zur tatar uramı”, “Keçe tatar tıqrığı”, “Tılmaçlar uramı”, tatarlarnıñ tarixi mäçete dä şuşı tirädä. Arkadiä dip atalğan binada ğomum mäydanı 18 meñ kvadrat metrdan torğan säwdä üzäge, açılğan könne ük eşli başladı inde. Biredä dönya küläm bilgele bulğan säwdä markaları kibetlärennän başqa kinoteatr da, restoran häm cäyge kafelar da bulaçaq. Yaqında ğına 5000 kvadrat metrlıq cäyge park açılaçaq. Biredä şulay uq “Şerbet” häm “ Bosfor” dip atalğan törek restorannarı da eşliäçäk. Açılış säwdä binasınıñ bu möräsim öçen maxsus tözelgän meñ keşe sıydırışlı çatır eçendä bardı. Ä inde cäygä ul çatırnıñ tubäse alınıp, ul açıq kafeğa äylänergä tieş ikän. Açılış tantanasın törek jurnalistı belän bergä, Rusiä televideniese diktorı Arina Şarapova alıp bardı. Başta şuşı üzäkneñ direktorlar şurası räise Xalim Mete çığış yasadı. Barısın da bu tantana belän qotlap, Rusiä belän Törkiä arasındağı bağlanışlarnıñ üseşe turında söyläde.Annan süzne Mäskäw merınıñ berençe urınbasarı Vladimmir Resin aldı. Häm ul şulay uq Mäskäwdä eşläwçe barlıq törek şirkätlären sanap kitep, alğa taba da Anqara belän Mäskäw arasında säyäsi häm iktisadı bağlanışlarnıñ nığuına ışanıçın belderde. Törkiä premyer ministrı Räcäp İrduğannıñ çığışın köçle alqışlar belän qarşı aldılar. Ul dekaber ayında Putinnnıñ Törkiägä säfären dä iskä alıp, bez qarşı säfärne şuşı binanıñ açılışına täğäyenläp kildek, bu yulı da Rusiä prezidentı belän oçraşu faydalı buldı, şuşındıy rusiä säwdä üzäge törkiädä dä açılır dip uylıym dide. Bu oçraşuda Tatarstannıñ wäkälätle wäkile Nazif Mirixanov ta qatnaştı. Bu waqiğağa Tatarstan prezidentı Mintimer Şäymiev ta zur iğtibar birde, şunın öçen min biredä , dide ul, häm Rusiä Törkiä mönäsäbätläre turında söyläp, Tatarstan belän Törkiä arasındağı bäyläneşlärgä dä tuqtaldı

Ä inde tantanalı açılış waqıtında premyer ministr Räcäp İrduğan belän Vladimir Resin qızıl tasmanı kiskännän soñ, ğädättägeçä şampanskiylar watmadılar, şuşı säwdä üzäge “Arkadiäğa” oxşatıp peşerelgän cide qatlı tortnı bülep barlıq qunaqlarnı da sıyladılar.

Näzifä Kärimova, “Azatlıq” radiosı, Mäskäw.

XS
SM
MD
LG