«Tatar cırı» festivalenä küpme tänqit belderelsä dä, älege çara inde 5 yıl rättän ütkärelep kilä. 16 ğinwar kiçendä bäyrämneñ tämamlaw konsertı ütte. Älege konsert täm-tomnar quyılğan öställär artında uzğan, bilet bäyäse 2 800 sum däräcäsendä bulğan. «Tatar cırı-2004 » festivaleneñ yañalığı – laureatlar isemlegendä yaña başqaruçılarnıñ buluı häm festival’ne alıp baruçılar itep Kamal teatrı artistlarınıñ çaqırıluı buldı. Tamaşanı säxnägä Kamal teatrı artistı häm rejiser İldar Xäyrullin quyğan. Anıñ äytüençä, säxnäne, tamaşaçını belgän drama artistların konsertnı çın tamaşağa äyländerer öçen çaqırırğa bulğannar.
«Tatar cırı2004» festivaleneñ yomğaqlaw öleşendä, yäş başqaruçılar belän bergä, ölkän cırçılarğa çığış yasarğa mömkinlek birelde. Mäsälän anda Läysän Ğimaeva, Güzäl Urazova, İldar Xakimov belän bergä Flüra Söläymanova da cırladı. Laureatlar isemlegendä yaña isemnär dä buldı. Ğolnara İsmaeva, Albina Apanaeva häm Ayğel Sağınbayeva berençe tapqır «Altın bars» bülägen aldı. Tinçurin teatrı artistı Rezeda Tuxvatullinanıñ da lauretlar isemlegendä kürenüe yañalıq buldı. Finländiä yäşäwçe tatar cırçısı Cämilä dä täwge tapqır «Tatar cırı» bäygesendä qatnaştı. Cämilä üze icat itkän «Min kilermen yanıña» cırı öçen büläklände häm Finländiä tatarlarınnan säläm citkerde. Barlığı «Altın bars» bülägen 20 başqaruçı aldı. Alar arasında Aydar Ğalimov, Alsu Äbelxanova, Gabdelfät Safin, Gölnara Timercanova, İlnar Säyfiev, Mälikä, Näfqat Niğmätullin, Salawat belän Xäniä Färxi dä bar.Tatar cırı festivalneñ töp sponsorı «Ukrtatnafta» şirkäte buluı turında xäbär itkän idek inde. Älege oyışma citäkçelege üzläre dä bu festival’gä kilep, laureatlarğa aqçalata büläklär öläşte häm üzläre belän tanılğan cırçını Safia Rotarunı da alıp kilde.
Sofiä Rotarunıñ cırlarınnan soñ konsertnı tatar artistlarına däwam itärgä turı kilde. Mäskäwdän çaqırılğan qunaq Rinat İbrahimov berniçä cır başqardı, Aydar Ğalimov, Xäniä Färxi häm Salawat ta cırladı. İñ soñınnan konsertta qatnaşuçılar «Tatar cırı» digän gimnı başqardı. Şunıñ belän «Tatar cırı 2004» festivale tämamlandı.Bikä Timerova.
