Qayber yäş millättäşlärebezneñ sport ölkäsendä bulğan uñışları belän dä tanıştırıp ütik. Omskida bu könnärdä mäktäp uquçıları arasında timerayaqta şuuçılarnıñ 2nçe qışqı spartakiadası bara. Anda xäzerge köndä Perm şähärendä uquçı Omski qızı Dinara Kälimullina qatnaşa. Uzğan yıl Mäskäwdä uzdırılğan yarışlarda parlap şuu törendä Dinara, Yuri Larionov belän bergä çığış yasap, “iñ matur par” digän isemgä layık bulğan ide. Şul uq sezonda ul Aleksey Rudometov belän Mäskäwdä il quboğına ütkärelgän yarışta 1 urınnı häm sport ostası kandidatı isemen yawladı. Omskida ütä torğan älege yarışlarda Dinara qabat Aleksey belän çığış yasıy. Älegä alar barlıq kürsätkeçlär buyınça aldınğılar. Yarışlar nindi näticälär belän tämamlanır - kiläse çığışıbızda xäbär itärbez.
Östäp şunı da äytergä kiräk, Dinaranıñ ätise tanılğan sportçı - grek-rim köräşe buyınça küp sanlı prizlarğa häm isemnärgä layıq bulğan – Timercan Kälimullin. Bügenge köndä Timercan äfände, trener bularaq, yäşlär belän şöğıllänä. Şunsı da ähämiätle, tatar balaları öçen ul maxsus törkem buldırdı. Xäzer törkem tuplaw buyınça eş bara. Törkemgä ömetle balalar cıynalsa, Timercan äfände alarnı tatar köräşe alımnarına da öyrätergä niätli. Şulay itep, kiläçäktä Omskilılarnıñ üz Sabantuy batırları buluı da ixtimal.
Küptän tügel Omskida boks buyınça atqazanğan sport ostası Aleksandr Ostrovskiy prizlarına yıl sayın uzdıra torğan Bötenrusiä turnirı bulıp ütte. Yäş millättäşebez Rişat Ähliullin anda ciñüçe buldı. Rişat sport ostası iseme normativların da ütäde, Annan tış ul şäxsi texniqa öçen maxsus büläkkä layıq buldı. Şunı da bilgeläp ütärgä kiräk, tatar yegete tatar millätennän bulğan trenerda - atqazanğan sport ostası Rafael'' Gafarov ta şöğıllänä.
Rozaliä Sayganova, Omski
