Accessibility links

чәршәмбе, 7 декабрь 2016, Казан вакыты 15:23

Xakimiätlär pensionerlar mäs’äläsen xäl itü yulların ezli, uram cıyınnarı däwam itä


Xakimiätlärneñ uram cıyınnarına nindi cawap qaytaraçağın belergä dip, jurnalistlar irtänge 10ğa matbuğat oçraşuına cıyılğan ide. Ämma cawap biräse keşelär kilmäde, brifing köndezge 2gä küçerelde, ämma ul waqıtta da bulmıy qaldı. Xakimiätlärneñ cawabı äle äzer tügel ide.

Ämma äytäse süzlärne inde xäzer uq çamalap bula. Tatarstan Prezidentınıñ matbuğat üzäge düşämbe kiçendä ber xäbär tarattı. Anda Mintimer Şäymievnıñ Rusiä xökümäte utırışında yasağan çığışı häm pensionerlar mäs’äläsen xäl itü öçen yasağan täqdimnäre turında süz bardı. Täqdimnär arasında pensionerlar öçen aylıq bilet birü digänne dä bar ide. Tatarstan prezidentnı şulay uq, yaqın arada pensionerlarnıñ ğözerlären iskä alıp konkret çaralar kürü mömkin häm kiräk, dip sanıy, dielä räsmi xäbärlärdä.

Qayber mäğlümatlarğa qarağanda, sişämbe könne Tatarstan Prezidentı Röstäm Miñnexanov häm başqa cawaplı keşelär belän oçraşıp, pensionerlar problemasın niçek xäl itü turında cıyılış uzdırırğa tieş ide. Qarşılıq belderüçelärdän eşlekle törkem xakimiätlär belän söyläşülär uzdıruı bilgele. Düşämbe könne şähär başlığı Kamil İsxaqov häm xökümät räise urınbasarı Zilä Wälieva qarşılıq belderüçelär belän söyläşülär uzdırdı. İke yaqnıñ nindi näticägä kilüe turında ber qayan da belep bulmadı. Şähär başlığınıñ pensionerlar mäs’äläsen xäl itü öçen nindi yuldan barırğa täqdim itüe turında da şähärneñ kiñ cämäğätçelek belän eşläw idäräsendä nindider añlatmalar birüdän baş tarttılar. Sişämbe könne belgänegezçä, ber törkem qarşılıq belderüçelär, Däwlät şurası binasında Färit Möxämmätşin belän oçraştı. Älege oçraşu turında beräm-särän mäğlümat çıqtı. Räsmi mäğlümat çaraları uram cıyınnarı turında mäğlümatnı birgändä bik saranlana, yä bötenläy birmi, yä bik az ğına.

Anıñ qarawı, qayber taşlamalarnıñ qaytarıluı turında xäbärlär küp buldı. Mäktäp aşları öçen bäyälär ike tapqırğa arta digän borçılu yazmalar, televidenie reportajlarınnan soñ Tatarstan xökümäte balalar aşatu tärtiben iskeçä qaldırırğa buldı. Küp tä ütmäde, Tatarstan Eçke eşlär ministrlığı wäkillärennän, militsiä xezmätkärlärenä transportta buşlaw yörü qaytarıla, digän belderü yañğıradı. Bu xäbär äfirğa äzerlängän waqıtta, yuğarı citäkçelekneñ qayda niçek itep oçraşuı, nindi näticägä kilüe turında äle bilgele tügel ide.

Bikä Timerova.

XS
SM
MD
LG