Accessibility links

җомга, 9 декабрь 2016, Казан вакыты 20:32

Qazanda pensionerlar mitingı däwam itä


Sişämbedä Qazannıñ Kamal teatrı qarşındağı mäydanda pensionerlar miting ütkärüne däwam ittelär. İsegezgä töşeräbez, taşlamalarnı kire qaytarunı taläp itkän öndämälär belän mäydanğa çığu ütkän atnanıñ şimbäsendä başlanğan ide. Ul düşämbedä dä däwam itte. Mitingta qatnaşuçılar xökümät wäkilläre belän söyläşülär alıp baru öçen üz wäkillären dä saylap quydılar. Atna başında Tatarstan xökümäte wäkilläre, şähär başlığı qatnaşında berençe söyläşülär dä ütkärdelär. Pensionerlarnıñ ike öndäre barlıqqa kilde. Berse, älegä qädär beräwgä dä bilgele bulmağan, Eşçe komitet isemle oyışma başlığı sıyfatında yörüçe Zaxarov familiäle keşe bulsa, ikençese, yazuçı Zäki Zäynullin. Zaxarov, qayber mäğlümatlarğa qarağanda RNE – Urıs milli oyışması belän bäyle. Taşlamalarnı aqçağa äyländerü turındağı qanun Mäskäwdä qabul itelgän buluına qaramastan, Tatarstan citäkçelegen ğäyepli. Zäki Zäynullin isä, respublika xakimiäte ike ut arasında qaldı dip belderde. Yäğni, Mäskäw qanun qabul itä, qayberäwlär xalıqnı Tatarstan xakimiätenä qarşı qotırta. Bu düşämbe yañalıqları bulsa, sişämbedä isä, pensionerlar wäkilläre Tatarstan Däwlät Şurasında parlament citäkçeläre belän oçraşuda buldılar. Bu xäbär äzerlängändä oçraşu näticäläre bilgele tügel ide. Monnan tış, mäydanğa çärşämbedä könne dä cıyılırğa qarar qılınğan. Zaxarovnıñ täqdime qazandağı timer yullarnı tomalarğa bulsa, Zäki Zäynullin, pensionerlarnı Däwlät şurası qarşında piket quyarğa çaqıra.

Şul uq waqıtta, Mäskäwdä yazılğan, imzalanğan qanunnı kamilläşterü, kilep tuğan wäzğıätne xäl itü maqsatında Tatarstan prezidentı Rusiä xökümäte eşendä qatnaştı.

Räfis Cämdixan

XS
SM
MD
LG