Accessibility links

шимбә, 10 декабрь 2016, Казан вакыты 04:11

Eçke eşlär Ministrlığı 2004 yıl näticälären bilgeli


18 ğınvarda Eçke eşlär Ministrlığı yıllıq utırışın ütkärde. Räsmi sannarğa qarağanda, Tatarstanda cinayätçelek däräcäse, kürşe töbäk häm ğomum Rusiädäge sannar belän çağıştırğanda tübänräk. Keşe sanına bülep qarağanda, 100 meñ keşegä 1,5meñnän artığraq cinayät qılu oçraqları terkälä.

Militsiä xezmätkärläreneñ dä iğtibar üzägendä taşlamalarnı beterü qanunı tora. Tärtip saqlawçılar da 1nçı ğinwardan yul yörü öçen üzläre tülärgä mäcbür. Jurnalistlar belän söyläşkändä, Däwlät Şurası räise Färit Möxämmätşin da älege mäs’älägä fikeren belderde. «Militsiäne tä’min itü, federal qaramaqta bulsa da, anı xäl itü yulların uylarğa kiräk, Tatarstan Prezidentı belän ütkärelgän kiñäşmädä bu xaqta da söyläşü bulaçaq», dide ul. ( Ul waqıtta, aylıq biletlar turında bilgele tügel ide äle.) Färit Möxämmätşin militsiä xezmätkärläreneñ buşlaw transportta yörü däğwäsı nigezle buluın tanıdı.

Yıllıq utırışta tağın zur rişwätçelek belän köräşkä dä zur iğtibar birelde. Ministr rişwätçelek belän köräş idäräse başlığı xisabı belän qänäğät bulmıyça, älege bülekne tänqit utına tottı. Soñınnan jurnalistlar belän söyläşkändä ul «bezneñ ällä nindi zur citäkçelärgä qarşı cinayät eşläre açılğan, ämma alar axırğa qädär citkerälmi, çönki tikşerüçeläreñ äzerlege citep betmi», dip belderde. Alayda, räsmi xisapqa, berniçä cinayät eşe turında mäğlümat kertelgän. Mäsälän, Qazannıñ Kirov rayon idäräse urınbasarı häm Aviatözeleş rayonnıñ toraq idäräse xezmätkärläre rişwät aluda totılğan. Arça rayon başlığınıñ, Byudjettan tış toraq fondı aşa tuğannarına 2 bülmäle fatir alıp birü eşe dä açılğan ikän. Şulay uq, xisapta äytelgänçä, Eçke eşlär Ministrlığı ütkän yılnı ataqlı oyışqa cinäyatçel töremnärgä qarşı möxäkämä eşlären başlağan. Terrorçılıqqa , narkotik äyläneşenä, fatir talaw, urlawğa qarşı eş alıp barğan. Ä 2005 yılda, töp wazifalarnıñ berse itep, Eçke eşlär Ministrlığı Ciñüçeneñ 60 yıllığı häm Qazannıñ 1000 yıllığın bäyräm itkändä iminlek sağında toru burıçın kürä.



Bikä Timerova.

XS
SM
MD
LG