Accessibility links

шимбә, 10 декабрь 2016, Казан вакыты 17:41

Tönyaq Koreadan qaytqan AQŞ kongresmenı Pxenyan atom programmasınnan baş tartuğa citdi qarıy di


AQŞ Wäkillär Palatasınıñ Qorallı Xezmätlär Komitetı räis urınbasarı Curt Weldon Tönyaq Korea atom qoralları yasaw eşennän baş tartu mäs''äläsenä citdi qarıy dip uylawın belderde. Ämma, Weldon äytüençä, Pxenyan Waşingtonnıñ Tönyaq Koreağa qarata qotırtuçı belderülär yasawın tuqtatuın taläp itä.

Weldon Tönyaq Koreadan bu komunistik ilneñ atom qoralı programmasın tuqtatu mäs''äläsen çişü turında çağıştırmaça optimistik uylar belän qayttı. Tokyoda ul jurnalistlarğa Pxenyan atom programmasınnan baş tartuğa citdi qarıy dide. Tik monıñ öçen Tönyaq Korea Amerikanıñ qotırtuçı belderülärdän tıyıluın taläp itä dide Weldon. Üzeneñ atom bombasın häm raketaların bulırırğa teläwçe Pexnyanğa qarşı Waşington kisken pozitsiädä tora. Berniçä yıl elek Bush xätta İran häm Ğiraq belän bergä Tönyaq Koreanı Zolım küçäreneñ ber öleşe dip atadı. Ämma Koreanı tänqitläwçelär ber Amerika belän genä tämamlanmıy. Xalıqara Atom Energiäse İdaräse başlığı Möxämmät äl-Baraday Tönyaq Koreanı atom texnologiäläre taralu qurqınıçına iñ zur öleş kertüçe dip atadı.

Şulay da, Amerikan kongressmenı Curt Weldon Tönyaq Korea uzğan atnada Pxenyanda bulıp kitkän, demokrat häm respublikan kongresmennar törkemeneñ bu mäs''älägä başqa, häm bälki uñayraq pozitsiädä toruın añladı di.

AUDİO: Bezneñ säfärneñ başında uq alar başqa törke qaraş, başqa delegatsiä buluın añladı. Şuña kürä alar bezgä işeklärne moñarçı kürelmägän däräcädä açtılar, ütkärgän söyläşülär ğädäti bäxäsläşülärgä ber-berebezne ğäyepläwlärgä genä qaytıp qalmadı.

Anıñ äytüençä, söyläşülär andıy üzara ğäyep atudan yuğarıraq kütärelep mäs''äläneñ asılı turında barğan.

AUDİO: Uñay yulğa niçek qaytu, monıñ öçen närsä kiräklege häm Tönyaq Koreanıñ axır çiktä bernindi atom qoralı bulmağan däwlätkä äwerelergä çınlap ta riza bulırmı yuqmı ikänlege turında bik tä açıq söyläşülär ütkärdek.

Ul Pxenyanda bulğannarnı üz süzläre belän sürätläwgä qarağanda, elek atom programması mäs''äläse turındağı 6-yaqlı söyläşülärdä Tönyaq Korea törkemendä ölkän wäkil bulğan Kim Kye Gwan süzlären kiterergä telim dide. Anıñ äytüençä, Kim Tönyaq Koreanıñ inde atom däwlätenä äwerelüen raslağan, ämma bu mömkinleklär saqlanu öçen ğenä digän. Kim şulay uq bu mömkinleklärne beterü turında söyläşülär mömkinlegenä dä işarä itkän.

AUDİO: Bu bälki Kim Kye Gwannıñ iñ möhim belderüe bulğandır. Ul atom mömkinleklären küz aldında totıp bez monı mäñge saqlarğa cıyınmıybız dide.

Tönyaq Koreanıñ räsmi KCNA xäbär agentlığı uzğan comğada ägär dä Weldonnıñ pozitsiäse AQŞ prezidentı Bushnıñ yaña administratsiäse alıp barğan säyäsättä çağılsa Pxenyan altı yaqlı söyläşülärne yañartırğa äzer dip belderde. Weldon bu belderüne älege xäbär agentlığında Amerikağa qarata bulğan iñ uñay yazma dip bäyäläde. Tärräqiät öçen mömkinlek bar disä dä, Weldon ul mömkinlek yuğaltıla ala dip borçıluın citkerde.

Sişämbe könne Waşintinda wazıyfasınnan kitüçe AQŞ däwlät sekretarı Colin Powell urınına täqdim itelgän Condoleezza Rice, bu wazıyfağa bilgelänüen raslaw tıñlawlarınıñ berençe könendä ägär dä Tönyaq Korea atom programmasınnan baş tartsa Waşingtin cawap qaytaraçaq dide.

AUDİO: Bez Tönyaq Korea xakimiätenä Quşma Ştatlar prezidetnı äytkännärne açıq itep citkerdek. Ägär dä Tönyaq Korea üzeneñ atom qoralları programmasınnan raslanırlıq häm kirekaytmaslıq däräcädä baş tartırğa äzer ikän, Quşma Ştatlarnıñ Tönyaq Koreağa höcüm itärgä, bärep kerergä cıyınmawın, Tönyaq Koreağa Quşma Ştatlar qatnaşında küpyaqlı iminlek garantiäläre bireläçägen citkerdek.

Naif Aqmal, Praga.
XS
SM
MD
LG