Accessibility links

пәнҗешәмбе, 8 декабрь 2016, Казан вакыты 09:05

Olkän keşelär transportta yörü mäsäläseneñ çişeleşe belän qänäğät


19 ğinwar könne Tatarstan prezidentı Mintimer Şäymievnıñ taşlamalar tiräsendäge wazğiätkä añlatmalar kertep, respublikada şuşı mäs’äläne xäl itü öçen kürelgän çaralar turında söyläwe, bar mäğlümät çaraları aşa da taratıldı. Bilgele bulğança, xäzer barlıq elek transportta buşlay yörgän keşelärgä 20 ğinwardan 1 fevral’gä qädär tülämi genä yörergä mömkin. 1 fevral’dän başlap isä, alar öçen taşlamalı, maxsus yörü biletı täqdim iteläçäk. Ä tüläwlärne aqçalata alırğamı yäki maxsus yörü biletın qullanırğamı - monı här keşe üze xäl itäçäk. Älege xäbärgä respublika xalqı uñay mönäsäbät kürsätte. Küplär monı Qorban ğäyetenä yasalğan bik şäp büläk bularaq ta qabul itte. Pänceşämbe könne Qazannıñ şähär transportında mäçetkä, tuğan-tumaçalarğa baruçı olı keşelär dä şaqtıy kürende. Bez soraşqan olı yäştäge qazanlılar da respublika citäkçelegeneñ bu qararın xuplawın belderdelär.

Şulay itep, taşlamalar belän qullanuçılarnıñ transportta yörü mäs’äläse çişelde diärgä dä bula. Läkin pensionerlar äle darular belän tä’min itü, toraq-kommunal’ xezmäte öçen tüläwlärdä bilgelängän taşlamalarnı kire qaytaru probleması xaqında da uylana. Läkin bu mäs’älälär qayçan häm niçek çişeler – älegä bilgele tügel.

26 ğinwar könne Tatarstannıñ Däwlät Şurası deputatları da üzläreneñ çirattağı utırışlarında taşlamalarnı aqçalata tüläwlärgä alıştıru mäs’äläsen tikşeräçäk. Anda çärşämbe könne Mintimer Şäymiev iğlan itkän üzgäreşlär uñayınnan taşlamalarnı tüläwlärgä alıştıru turındağı qanunğa üzgäreşlär kertü turında süz baraçaq, dip xäbär itte Däwlät Şurası räise Färit Möxämmätşin.

Gölnaz İlgizär

XS
SM
MD
LG