Accessibility links

якшәмбе, 11 декабрь 2016, Казан вакыты 05:21

Qazanda Qorban bäyräme Bolğar mäçetendä ütte


Tatarstan möselmannarı möftie Ğosman xäzrät Qorban ğäyete namazın Qazannıñ Bolğar mäçetendä ütkärde. İnde ğädäti xälgä äylänep kilä buğay, möfti xäzrätneñ älege mäçettä Qorban bäyrämen uzdıru. Çınlap ta, Yaña Savin rayonında urnaşqan bu mäçetneñ urnaşqan urını şaqtıy caylı, xalıq küp sıya. Monnan tış, şähär cirendä böten urında da Qorban çalıp bulmıy. Ä Bolğar mäçetendä monıñ öçen maxsus urınnar bilgelängän.

Ğäyet namazı ğädättägeçä azan äytü, yäğni namazğa çaqırudan başlandı. Ğäyet namazınıñ töp mäğnäse, möselmannarnıñ bergä cıyılıp, İslam öndärläreneñ wäğäzen tıñlaw, fätwäsen belü. Tatarstan möftie Ğosman xäzrät tä azan çaqıruı yañğırağannan soñ wäğäz söyli başladı.

Ğosman xäzrät Qazanda illeläp, respublikada meñnän artıq mäçettä Ğäyet namazı uqıluın äytep uzdı.

Äytep uzılğança, Qorban çalu-ul xac qılu könnäre dä. Tatarstan möftie, üzeneñ wäğäzendä xac turında da äytep uzdı.

Olı bäyräm wäğäzendä möfti millät turındağı, anıñ kiläçäge xaqındağı fikerläre belän dä büleşte.

Wäğäzdän soñ, xalıq täkbir äytep, namaz uqıdı. Ğäyet bäyräme namazı şaqtıy qısqa bulğanğa, bu yola da ozaqqa suzılmadı.

Qorban bäyräme bulğaç, älbättä Qorbannarsız bulmıy. Namazdan soñ, qorbannar çalındı. Bu waqıtta, mäçet tirä yağı çın bazarğa äylänep qala. Yaqın-tirä awıllardan xalıq , sarıqlar satırğa kilä. Qorban çalırğa niäte bulğan härkem şunnan sarıq satıp alıp, mäçet yanında uq eşkärtterä dä ala. Qazannıñ Bolğar häm başqa mäçetläre yanında da şundıy wäzğıyät buldı.

Räfis Cämdixan

XS
SM
MD
LG