Accessibility links

Кайнар хәбәр

Qırğızstan parlamentı saylawlar turındağı qanunğa üzgäreşlär kertüne xupladı


Qırğızstan qanunçığaru şurası deputatları ildä soñğı 5 yıldan äzräk yäşägän namzätlärne saylawlarğa terkämäskä digän qanunğa üzgäreş kertüne xuplap tawış birde. Monnan soñ oppozisiäneñ 4 deputatı, Qırğızstannıñ çit däwlätlärdäge elekke ilçeläre Roza Otunbayeva, Usen Sıdıkov, Medetkan Şerimkulov häm Mambet-junus Abılov, kiläse ayda ütäçäk parlament saylawlarında qatnaşa ala. Ämma qanunğa üzgäreş ğamälgä kersen öçen anıñ prezident Askar Akayev tarafınnan imzalanuı kiräk. Moña Akayevnıñ 30 kön waqıtı bar, namzätlärne terkäw waqıtı irtägä tämamlana. Oppozisiädäge Asaba (bayraq) isemle milli yañarış partiäse citäkçese Azimbek Beknazarov, Akayev qanun ölgesenä qul quymasa, ğayep anda bulaçaq, dip belderde: "Qanun ölgesen imza quyarğa bügen cibärsäk, prezident aña irtägä qul quysa, bezneñ 4 diplomat şunda uq parlamentqa namzätlär itep terkäläçäk. Akayev qanunnı imzalamasa, bu minem şäxsi fikerem, diplomatlar tiräsendäge böten nizaqlarğa prezidentnıñ qatnaşı bar dip äytep bulaçaq," dide oppozisiädäge Asaba firqase başlığı. Elekke 4 ilçene yaqlap bügen parlament qarşına 30ğa yaqın keşe çıqqan. Uram cıyınnarın oyıştıruçı oppozisiäneñ ike wäkile qulğa alınğan. Tärtip saqlawçılar alarğa uramnarnı yabıp maşina yöreşen tuqtatuda ğayepläw belderde.
XS
SM
MD
LG