İslam dineñ iñ zur bäyrämnäreneñ berse - qorban ğayetenä Udmurtiä başqalası İjaw şähäreneñ Cämiğ mäçetenä keşe bik küp cıyıldı. Xäbärlärgä qarağanda, respublikanıñ başqa ğibädät binalarında da bäyrämne zurlap bilgeläp üttelär
İjaw cämiğ mäçetendä irtänge namazdan soñ wäğäzne cıyılğan xalıq zur iğtibar belän tıñladı. Anı İjaw Cämiğ mäçete imamı Faiz xäzrät Möxämmätşin söyläde. Wäğäzneñ eçtälege şäriğät qanunnarın tögäl ütäwgä, uzara duslıqnı, berdämlekne, tatulıqnı saqlap qaluğa, firqälärgä bülenmäskä bağışlanğan ide. Aralaşıp, nizağqa kermiçä, yäşärgä omtılırğa kiräklege Faiz xäzrätneñ wäğäzendä töp yunäleş bulıp tordı. Ğayet namazınnan soñ ärwaxlar ruxına bağışlap, qor'än uqıldı, doğa qılındı. Ğayettän soñ din qärdäşlärebez qorban çalırğa aşıqtı. Faiz xäzrät äñgämäbezdä bıyılğı bäyräm üzençäleklärenä tuqtalıp, tübändägelärne bilgeläp ütte. (audio)
Bıyıl başqa yıllardan ayırmalı bularaq, qorbanlıqlar äzerlärgä ölgermägän möselmannarğa, mäçet tiräsendä tuqtalğan maşinalardan mal da satıp alırğa da mömkin ide.
Berniçä yıl elek Faiz xäzrät respublika citäkçeläre aldında — möselmannarğa şuşındıy dini bäyrämnär könendä yal köne birü turında süz kütärgän ide — bu mäs'älä älegä çişelmäde. Mäçettä ğayet namazında qatnaşuçılarnıñ moña fikere mondıy. (audio)
Dörestän dä, Udmurtiä möselmannarı ramazan häm qorban ğayete bilgelänep ütelgän könnärdä Tatarstan häm Başqortstan respublikalarındağı din qärdäşlärebez kebek yal itmi, eşli. Şuña da bu mäs’äläne citäkçelär aldında kütärü urınlı da, waqıtlı da. Bälki islam dineneñ iñ olı bäyrämnäre könendä Udmurtiädä yäşäwçe möselmannar da yal itä alır.
Ğayet namazlarına mäçetkä keşe yıldan yıl küp kilüe, alar arasında yäş yegetlär—qızlarnıñ sanı da baytaq buluın bilgeläp ütärgä kiräk. Äñgämädä mäçetkä kilüçelär elek-elektän dini bäyrämnärebezne bilgeläp ütärgä tırıştıq, bügen inde balalarıbız, onıqlarıbıznı da islam dine qanunnarın ütäp yäşärgä öyrätäbez dip urtaqlaştılar.
Xämidä Ğayfullina, İjaw
