Accessibility links

якшәмбе, 11 декабрь 2016, Казан вакыты 03:25

Söğüd Ğäräpstanınıñ Yuğarı Möftie ğönahsız keşelärne üterüne tänqitläp çıqtı


Çärşämbedä Söğüd Ğäräpstanınıñ yuğarı ruxanie xacğa kilgän möselmannar aldında uqığan wäğäzendä, "şaytan tarafınnan qotırtılğan" ğönahsız keşelärne üterüçe qayber mö''minnär İslamğa zur zıyan kiterä, digän süzlär äytte. Qayber küzätüçelär monı terrorğa qarşı belderü dip bäyäli, ämmä şul uq waqıtta anıñ islam suğışçılarına ällä ni yoğıntısı bulmas digän fikerdä.

Söğüd Ğäräpstanınıñ yuğarı möftie şäix Äbdel-Aziz äl-Şäix çärşämbedä xacğa kilgän 2 millionnan artıq möselman aldında totqan wäğäzendä, İslamğa iñ zur zıyannıñ berse anıñ "şaytan tarafınnan qotırtılğan" üz ullarınnan kilä. Alar millätlärne qäfer dip atıy, şartlawlar, cimerülär oyıştırıp, qan tügep, ber ğönahsız keşelärne üterep cirgä yawızlıq çäçä, dide. Yäş möselemannarğa möräcäğät itep, äl-Şäix, sez Allağı täğälä qarşına qan tügüçe bulıp basırğa telisezme? dip soradı. Bu süzlärneñ izge xac könnärendä, 70läp ildän kilgän möselman aldında äytelüe aña ähämiät östäde. Wäğäzne üz qolağı belän işetkän Söğüdneñ ingliz telendä çığuçı Arab News gäzite möxärrire Fäisal Ali süzlärençä, möfti İslamnıñ tınıçlıq häm tüzemlelek dine buluı turında söylägän:

Audio (Fäisal Ali)

"Yuğarı möftineñ bu wäğäze ekstremistlar tarafınnan qotırtılğan yäşlärgä, suğışçan İslamnı alğa sörgän Äl-Qaidä, Ansar Äl-İslam kebek törkemnärgä yünälgän ide. Möfti bar dönyağa İslamnıñ köç qullanuğa qarşı, tınıç din buluın añlattı."

Söğüd Ğäräpstanında Äl-Qaidä belän bäyle törkemnär höcüme näticäsendä 2003neñ Mayınnan birle 100dän artıq keşe häläq buldı, kübese – çit il keşeläre. Xac könnärendä terror ğämälläre buldırmas öçen Söğüd räsmiläre köçäytelgän iminlek çaraları kürde.

Londondağı Xalıqara mönäsäbätlär institutında Söğüd belgeçe Mai Yamani fikerençä, bu wäğäz berençe çiratta Söğüd xökümätenä qarşı köräşkän söğüd suğışçılarına yünältelgän:

Audio (Mai Yamani)

"Möfti berençe çiratta Söğüd Ğäräpstanına möräcäğät itte. Söğüd rejimın, Äl-Saud ğailäsen saqlaw – anıñ wazifası. Şul uq waqıtta älbättä, kürşe illärdäge köç qullanu da Söğüdlär öçen naçar, şul uq Ğiraqqa saqlanmağan çiklär aşa keşelär, qorallar ütep yöri."

Yamani süzlärençä, bu wäğäzneñ salmaq qaraşta torğan, köç qullanu, terrornı önämägän möselmannarğa yoğıntısı bulaçaq, läkin ul şunnan da arı kitmiäçäk.

Ä menä Arab News gäzite möxärrire Fäisal Ali süzlärençä bu wäğäzneñ Könbatış illärendä İslamnıñ qıyäfäten yaxşırtuda öleşe zur bulaçaq.

Audio (Fäisal Ali)

"Min monda küp keşelär belän söyläştem, alar barısı da möftineñ wäğäze yaxşı ide, bu Könbatışta İslamğa qarata terrorçılar arqasında tuğan yalğış qaraşnı tözätergä yärdäm itäçäk, digän fikerdä."

Berük waqıtta yuğarı möfti üzeneñ wäğäzendä dönyada möselmannarğa qarşı oyıştırılğan kampaniälärne: xärbi, iqtisad ölkäsendä, mäglümät çaralarındağı kampaniälärne telgä aldı. Xacilärgä möräcäğät itep, ul Allağı täğälä häm Möxämmät piğämbär süzenä tuğrı qalırğa, könbatış sivilizatsiä yalğanına aldanmasqa çaqırdı.

Şul uq waqıtta Yamani süzlärençä, islam suğışçıları da näq menä şul sivilizatsiälär bäreleşe, möselman bulmağannarnıñ möselmannarğa qarşı höcüme turında söyli.

-Ali Gilmi
XS
SM
MD
LG