Accessibility links

дүшәмбе, 5 декабрь 2016, Казан вакыты 23:46

Tatar bazarı: Qazanda qayda aşarğa?


Tatar bazarı rubrikası dip isemne zur itep alğan bulsaq ta, älegä Qazan buylap säyäxät itäbez.Döresräge, Qazandağı bazar tormışın öyränüne däwam itärgä buldıq. Ni öçen disägez, Qazan tatar başqalası. Monda anıñ töp säyäsi bazarı da, monda anıñ mädäni qaznası da. Kitabı da, gäzite dä asılda monda basıla, milli mädäniättä modanı da qazan tudıra nigezdä. Şulay bulğaç, Qazanda tatar bazarı- ul millät bazarı. Monnan tış, tağın ber möhim äyber bar- ul tatar başqalasınıñ meñ yıllığı. Näq menä meñ yıllıq Qazanda nindi aşxanälärdä täğäm cıyıp bula. Bügenge çığarılışıbız şul turıda.

Qazanda, qazanlılar üzläre dä, kilgän qunaqlar da 1090 cirdä tamaq yalğıy alalar. Bu sanğa uram çatlarındağı gamburger belän qaynar kähwä täqdim itüçe urınnar kermi. Ä süz qaynar, tulı qanlı aş aşaw xaqında bara. Törleçä aşaw, oçsızlı kafe, sovet çorı ise kilep torğan aşxanälärdä dä aşap bula, qimmätle fransuz, yapun restorannarında da. Kesäñ genä qalın bulsın.

Ä restorannar. Ğadi xalıq, Qazanda yañğırdan soñ çıqqan gömbälär kebek açılıp toruçı restorannarda yörime soñ? Älbättä, tramvay yörtüçelär monı üzlärenä röxsät itä almıy. Yäşlär mömkinlek taba. Süz Aygöl Nurlığa.

Älbättä, qimmätle häm zatlı restorannar Qazannıñ üzägendä urnaşqan. Läkin Bauman uramında tügel, ä yaqın tiräsendä. Monda, telegän keşe awrupaça äzerlängän rizıqlarnı törle restorannardan awız itä ala. Mäsälän, ispan rizıqların Afrodita, almannıqın Бочка yäki Drim-kafe, italyannıqın Venetsiä restorannarında aşap bula. Ägär üzeñne yapun itep xis itäseñ kilsä, räxim it: Ostrovskiy uramında “Yanagi” restoranı, añardan yıraq tügel yapun kuxnyası kafesı “Yakitoriä” bar. Televideniedäge seriallarda ğına kürgän meksikalı bulasın kilsä, ütkän yıl azağında ğına açılğan “Paprikas” aşxanäsenä kerep çığıp bula. Sıra, bu oçraqta zatlı, tere sıra eçep, susaw basarğa disäñ, Berloga digän sıraxanä eşli. Tämläp aşarğa cäm xuş isle çäy eçärgä Kapital çaqırıp tora. Üzäktän yıraq kitmiçä genä “Rıba” dip atalğan kafeda matur ğına gäp qorırğa mömkin. Ul Profsoyuz uramında urnaşqan. Yıraq tügel, biş yoldızlı “miraj” qunaqxanäse. Mondağı “Opera” restoranında tel yotarlıq rizıqlar üzläre awızğa kerergä äzer sıman. Ä mähabät Piramidadağı restoranda tämläp aşaw ğına tügel, Qazan Kirmänendäge Qol-Şärif mäçetenä dä qarap soqlanıp bula.

Ä bäyälär soñ niçek dip aptırıysızmı. Zatlı aşxanälärdä ğädättä bäyäse dä zatlı inde. Läkin, kübesendä 150-200 sumğa biznes-lanç täqdim itälär. Mondıy eşlekle öylä aşları Qazan üzägendä urnaşqan “Arena” küñel açu üzägendä bik populyar. Tämle tamaq läzzätlänep aşar öçen 800-1000 sumın cällämi inde. Çınlap ta, 30-50 dollarğa canıñ telägän restoran tabıp bula.

Mäsälän, telgä alıp ütkän “Рыба” restoranın alıyq. Monda qısla, “parmezan” dip atalğan sır, kon'yak sousı quşılğan salat 219 sum tora. “Afrodita” restoranında 329 sumğa şpinatlar, töçe qamır quşılğan Semga balığınıñ yomşaq itlären aşap bula. “Rossini” sıyır ite” dip atalğan rizıqnı “Arena”da awız itep qarağa täqdim itäm. Ul aldan, tämlätkeç ülännär häm zäytün mayında totılğan itneñ yomşaq kisäklären, gril'dä qızdırğannan soñ, maxsus konvektomat dip atalğan miçtä peşerelgän rizıq. İtne niçek qızdırunı sez üzegez äytäsez. Anı qatı itep qızdırta alasız, yäki kiresençä. Kiräk tapsağız, qanda qızdırıp ta birälär. Bu barısı da “Demiglass” sousı belän birelä. Älege fransuz aşı 230 sum tora.

Qazanda tämle tamaq modasın kem tudıra soñ? Yuğarı zäweqle aşxanälär rätendä yörergä telägän restorannar, saranlanmıyça, peşekçelärne Mäskäw, Sankt-peterburg şähärlärennän çaqıralar. Qazannıñ küp kenä restorannarı şundıy tärtiptä eşli.

Milli rizıqlar, tatar başqalası qazanda, bik kiñ taralmağan. Bauman uramındağı Tatar kulinariäse yortı äz genä bu buşlıqnı tudırdı, älbättä. Läkin mondağı bäyälär beraz teşlilär şul. Läkin, yaqın kiläçäktä, tatar milli rizıqları täqdim itüçe, kesägä suqmıy torğan bäyäle aşxanälär açılır dip ömet itäse kilä. Qazannıñ 1000 yıllığın bäyräm itärgä kilgän, mäsälän, alman yä fransuz, üz restoranın ezläp yörmi bit inde. Ä kiresençä, tatar başqalasında tatar rizığın – öçpoçmaq, qıstıbıy, göbädiäsen awız itärgä teli.

Aygöl Nurlı

Menä şundıy zäwıqlar. Älbättä här törle zäwıqnıñ asılında mömkinlek bulu yata. Berençe çiratta aqça. Läkin, ul ğına tügel. Tämle rizıq buldıru- osta peşekçe eşe. Şul isäptän, kilgän qunaqlarnı tatar milli rizıqları belän sıylaw öçen dä osta peşekçe kiräk. Yıllar buyına awızdan täme kitmäslek itep peşerä torğan. Ä osta peşekçelär uramnan kergän keşelär tügel.

Qazanğa kilep tamaq yalğap çığarğa uylasağız, sezne menä şundıy xällär kötä. Teläsägez, 60-70 sumğa ğadi rizıq, teläsägez, berär restoranda 150-200 sumğa biznes-lanç aşıy alasız. Ä tämle itep peşerelgän tatar göbädiäläre turında ayırım söyläşerbez.

Tatar bazarı rubrikası buldı. Qazan aşxanäläre buylap Aygöl Nurlı häm Räfis Cämdixan säyäxät itte.

XS
SM
MD
LG