Accessibility links

якшәмбе, 4 декабрь 2016, Казан вакыты 19:24

Aygöl Sağınbayıva - tatar estradasınıñ yoldızı


Aygöl Sağınbayıwanıñ “Tuğan yaq” cırı soñğı aylarda iñ populyar muzıkal' küreneşlärgä äwerelde. Altın Bars festivalendä ğädäti bulmağan teträndergeç temalar kütärelsä, İl'dar Zaripovnıñ X.Mostafin süzlärenä icat itelgän bu cır xäzerge estrada öçen ğädäti bulğan tuğan yaq turında. Ämma anıñ köye häm cırçınıñ kömeş tawışı tamaşaçılarnı äsir itte. Qayan çıqqan bu Aygöl digän qız? Familiäse dä anıñ Sağınbayıwa. Niçek itep ul tatar cırınıñ neçkäleklären, xäzerge zaman ähañnären totıp alğan. Mömkinlek bulsa, yäkşämbe könne turıdan-turı efirğa çıqqan mädäniät dönyası tapşıruında Aygöldän şul turıda sorar idem. Bıyılğı festival'neñ ciñüçeläre arasınnan barı tik ul ğına bu tapşıruda qatnaştı. Äle bıltır ğına anıñ kem ikänlegen dä belmädelär. Tuğan yaq cırı da kiñ xalıq öçen tumağan ide. Şundıy çibär häm talantlı tutaş qayan kilep çıqqan dip soraşuçılar yış oçrıy. Ämma mädäniät dönyası tapşıruında distälägän telefon şaltıratuı bulsa da, efirda mondıy soraw yañğıramadı.
Nik Altın Bars tege yäki bu cırçığa eläkmäde, ni öçen cırlarnıñ avtorları häm kompozitorlarına büläk birelmäde, tege yäki bu keşegä Tatar cırına bilet eläkmäde kebek sorawlar yañğıradı bu tapşıruda. Studiädä utıruçılarğa xalıq telefon aşa sorawların citkerde. Nigezdä şaltıratıp, tatar cırın qayğırtuçılar arasında ölkän yäştäge keşelär buldı. Şunısı qızıq, qayberäwlär festival'dä qatnaşqan yäş cırçılarnıñ şärä kendekläre, eçke kiemnäre turında kübräk süz quyırttı.
Rämis Äymät isemle şağir, anıñ süzlärenä yazılğan cır ciñüçelär isemenä eläksä dä, üzeneñ buşlay Piramidağa kertelmäwe turında başta televidenie ekrannarı aşa, annarı turıdan-turı efirğa kilep qızıp-qızıp söyläde. Festival'ne oyıştıruçılar eşneñ bolay kitäsen belsä, möğayın başta anı häm başqa şağirlärne ezläp tabıp, tür başına utırtır idelär. Ämma töp süz ul turıda tügel. Rämis Äymät häm telefon aşa şaltıratqan ber tamaşaçı festival'dä başqort cırçıları küp qatnaştı dip qänäğätsezlek belderdelär. Rämis Äymät xätta bu yuğarıda utırğan Başqortstan wäkilläre tarafınnan yasalma eşlänä digän säyer fiker ıçqındırdı. Robert Miñnullin mondıy faraznı provokatsiä dip atadı, çönki Zilä Sönğatullina, Xäniä Färxi, İdris Ğaziev, Salawat, Xämdünä Timerğaliewa, İl'dar Xäkimov, Aydar Galimov häm başqa bik küplär tanışlıq aşa tügel, ä üz talantları aşa yul açqan cırçılar. Studiädä utıruçılar alar başqortlar tügel, ä Başqortstannan çıqqan tatar cırçıları dip tözättelär Rämisne. Şunıñ belän süzne tämamlarğa da mömkin. Ämma xaqiqät mäcbür itä. Bıyılğı ciñüçe Aygöl Sağınbayıwa Başqortstannıñ Uçalı rayonında tuıp üskän çın başqort qızı, anı cırçı Salawat tabıp, üz programmasına kertkän. Xäzer Aygöl Qazannıñ mädäniät sänğät Akademiäsendä uqı. Häm menä digän itep cırlıy, layıqlı räweştä tatar cırı konkursında ciñep çıqtı. Berniçä yıl elek mädäniät ministrlığı ütkärgän tatar cırı konkursında Ufada yäşägän başqort yegete Xäsän Usmanov tatarnıñ Ällükien başqarıp, berençe urın alğan ide.
Şulay itep tatar cırı bäygesendä barı tik Tatarstannıñ rayonnarında tuğan cırçılar ğına qatnaşsa, bu bötenläy başqa küreneş bulır ide. Tatar sänğäte häm ädäbiäte tamırların tirängä häm yıraqqa suzuı belän köçle. Turı efirda qatnaşuçılarnıñ kübese şulay dip sanıy. Ämma şulay da ayırım şäxeslärneñ mondıy provokatsion ğämälgä baruları küñeldä yoşqı qaldıra. Ufada da, Qazanda da, başqa cirdä dä matur yaña cırlar tuıp, anı yäş cırçılar başqarsa, kemgä zıyan?
Başqort qızı üz xalqınnan ayırılmıyça, tatar sänğätenä işek aça ikän, bu yäşlärne quandıra. Milli estrada ğına tizräk kütärelep, ayaqqa bassın ide.
Al'bina Zäynulla, Qazan.

XS
SM
MD
LG