Tatarstan Respublikasınıñ Ural töbägendäge daimi wäkile Rawil Bikbov bu könnärdä Kurgan ölkäseneñ Şadrinsk şähärendä bulıp qayttı. Anda ul Şadrinski şähäre başlığı Aleksey Kokorin, Kurgan ölkäse gubernatorı urınbasarı Aleksandr Mazein, Ural federal'' okrugınıñ Kurgan ölkäsendäge baş federal'' inspektorı Vladimir Balakin belän oçraştı. Oçraşu waqıtında süz Tatarstan Respublikası belän Kurgan ölkäse arasındağı mönäsäbätlärne sıyfat yağınnan yuğarıraq däräcägä kütärü maqsatı belän başqarılaçaq çaralar turında bardı. Şul uñaydan Tatarstannıñ Uraldağı daimi wäkile Rawil Bikbov Kurgan ölkäse gubernatorı Oleg Bogomolov belän oçraşaçaq. Xäzer ul oçraşuğa äzerlek başlandı.
Şadrinsk şähär xakimiäte binasında bulıp uzğan älege eşlekle oçraşudan soñ, urındağı möselmannar cämğiäte räise Räfqät Fäyzullin şähär xakimiäteneñ cämäğätçelek belän eşläw bülege mödire Valeri Şvetsov belän Rawil Bikbovnı şähärneñ üzbäk aşları kafesına, Qorban bäyräme uñayınnan äzerlängän tabın yanına çaqırdı. Qorban aşınnan awız itärgä dip biregä 200дән artıq möselman cıyılğan ide. Bäyräm namazı uqılıp, bäyräm wäğäze söylängännän soñ, üzara qotlawlar buldı. Rawil äfände Bikbov Şadrinski möselmannarın Tatarstan prezidentı Mintimer Şäymiev isemennän qotlap, alarğa izge teläklär yulladı. Valeri äfände Şvetsovqa tübätäy büläk itte.
Annan soñ biredäge tatar milli tormışın da, dini eşlärne dä oyıştıruda başlap yörüçelärdän Äxmädulla xaci, Qalıy äfände Baydaşev häm şähär xakimiäte wäkile Valeri Şvetsov belän berlektä, “İset” gazetası redaksiäsendä jurnalistlar belän oçraşu uzdırıldı. Tirajı 12 meñgä citkän bu gazeta xalıq arasında bik populyar gazetalardan sanala. Oçraşu waqıtında süz Kurgan ölkäsendä milli massaküläm mäğlümat çaraların üsterü turında bardı. Bu eşneñ berençe adımı itep gazetağa tatar telendä quşımta yasaw mömkinçelege qaraldı. Gazeta citäkçeläre milli temalarnı yaqtırtu buyınça maxsus bülek buldıru mömkinçelegen dä äytep üttelär. Ğomumän, bu söyläşülärdän kürengänçä, biredä üzara faydalı xezmättäşlek öçen uñay cirlek bar. Tağın şunısın da äytep ütmi bulmıy, Kurgan ölkäsendä berençelärdän bulıp, Şadrinski şähärendä kabel'' televideniese arqılı Tatarstan – Yaña Ğasır televizion kanalı tapşıruların kürsätü oyıştırılğan.
Şadrinski şähäreneñ iñ ere predpriätieläreneñ berse – avtoagregatlar zavodı citäkçeläre belän oçraşu da bik eşlekle, faydalı bulıp uzdı. Bu zavod belän KAMAZnı inde küptän üzara xezmättäşlek cepläre bäyli. Uzğan yılda ğına da KAMAZğa 227 million sumnan artıq produktsiä cibärelgän. Oçraşu waqıtında biredä üzara elemtälärne tağın da üsterü yulları qaraldı.
Kurgan ölkäse qüäte yağınnan Sverdlov häm Çiläbe ölkälärennän küpkä ayırılıp torsa da, biredä Tatarstan belän ike arada faydalı bäyläneşlärne üsterü öçen nigez bar. Bu bigräk tä anda yäşäwçe tatar xalqınıñ milli üseşe öçen bik uñay şartlar tudıraçaq. Tatarstannıñ Uraldağı daimi wäkile Rawil Bikbov, Kurgan ölkäsendä bulıp, citäkçelär belän dä, cämäğätçelek belän dä oçraşıp qaytqannan soñ, şundıy näticägä kilde.
Fäwiä Safiullina, Yekaterinburg
