Accessibility links

шимбә, 10 декабрь 2016, Казан вакыты 08:23

Qazanda Tatyana köne


Qışqı sessiä tämamlanu belän Rusiä studentları ğädättä studentlar yäğni Tatyana könen bäyräm itälär. Älbättä, bu bäyräm sessiäne uñışlı ğına, qoyrıqsız tämamlağan studentlar öçen çın bäyräm sanala. Ämma imtixannarda naçar bilge algan, studentlarça äytkänçä, qoyrıq üskännären dä Tatyana köne çittä qaldırmıy. Bu könne andıy studentlarnıñ imtixannarnı yañadan birep qaraw mömkinlege bar.

Mäskäw universitetınıñ xäzerge rektorı Viktor Sadovniçiy üz färmanı belän bu könne bäyräm dip iğlan itkän. Çönki näq şuşı könne Mäskäw universitetınıñ 250lе yäşlek yubileyı. Qazan universitetınıñ rektorı Mäqzüm Säläxov Viktor Sadovniçiynıñ çaqıruı buyınça MGU bäyrämenä kitkän. Ä Qazan studentları bu waqiğağa niçek qarıy soñ? Alar närsägä mökibbän?

Älbättä, eş monda Mäskäw universitetında ğına tügel. Härkem üzeneñ uqu yortın yarata häm zurlıy. Citmäsä, Tat''yana digän xatın-qız iñ berençe studentqa bulğan digän faraz raslanmıy. Xätta aspirant yäki professor da bulmağan. Bäyrämneñ tarixı din belän bäyle – bu xristian dinendä qalu öçen qorban bulğan izge Tat''yananı iskä alu köne dä.

Çınlıqta ruslarnıñ milli ğörefe bulğan bu bäyrämne başqa millät studentları da bäyräm itä. Monıñ beraz säyer ikänlegen çamalawçılar bar. Ämma ğädättä andıylar endäşmi. İzge dä bulğaç, Tatyana da bulğaç, bu inde xörmätle häm qızıqlı tarixtır dip uylap, bäyräm itügä qarşı çıqmıy. Ä bit bu pravoslav dinen totuçılarnıñ Pasxa bäyrämen, yäki raştuanı möselman mäçetendä cıyılıp, mullalar, şäkertlär bäyräm itügä oxşap tora. Tatarstan Yaña ğasır televidenieneñ tapşırularında Qazan universitetınıñ tatar jurnalistika häm filologiä fakul''tetı yegetläre häm qızları studentlarnıñ bäyräm käyefe, izge Tat''yana turında ilhamlanıp söylädelär. Ber tatar qızı bu könne dus qızları-yegetläre belän iptäşlärneñ fatirında mäcles qorğannan soñ diskotekağa barıp, tön buyı biergä cıyınuların äytte. Tağın ber tatar studentçası dusları belän kafeğa barıp, küñel açıp utırırğa cıyına ikän.

Döresen äytergä kiräk. Räsmi räweştä Qazan yuğarı uqu yortlarında bernindi bäyräm çaraları bilgelänmäde. Ul Tat''yana isemen izgeläşterüçelärneñ genä üz ğörefe ikän. Tänzilälär, Täslimälär üzlärençä bäyräm itä diär ideñ, xäzergä küpçelek studentlarda bäyräm qayğısı yuq. Çönki küplär haman da äle imtixan sirat küperen kiçep çıqmağan. Bez berniçä institutqa şaltıratıp qaradıq. Tatarstan studentlarınıñ kübese soñğı imtixannarın tapşıra. Tatar gumanitar universitetında studentlar yäğni Tat''yana bäyrämen ütkärgänebez yuq, bezneñ mart ayında ütkärelüçe “Yägez äle qızlar!” digän bäyrämebez bar digän cawap qaytardılar.

Tatarstanda bu könne tuplı xokkey buyınça dönya çempionatı açılu aldınnan yäşlär häm sport eşläre ministrı Marat Barievtan yäşlär säyäsäte, yäş ğailälärgä däwlät yärdäme, respublikada sport üseşe kebek sorawlarğa tatarinform saytında sorawlar birü mömkinçelege buldı. Şundıy sport yarışı könendä Tat''yana turında bik ällä ni iskä almıylar.

Şulay da barlıq televidenie, radio kanalları, Qazanda çığuçı gazetalar 25nçе ğinwar könen Tat''yana köne dip iğlan ittelär. Ğäyre räsmi räweştä dä zur bäyräm awazları çığarıp bula ikän. Qayber yeget häm qızlarda şundıy soraw tudı. Ä tatar studentlarınıñ üz bäyrämnären buldırırğa kem qomaçawlıy? Elekke zamannarda mädräsä şäkertläre därtlänep, üz awazların işettergännär, tormış turında kümäkläşep, kiñäş totarğa xıyallanğannar. Äle dä milli cıyılışlarda başqarıla torğan “Uyan tatar!” cırın beläsezme? Anı xäzer Räfis Qorbanov yazğan zamança süzlär belän cırlıylar. Universitetnıñ ber aqıllı professorı şunı äytte – bu cırnıñ üz iseme “Şäkertlär sadäse” yäğni şäkertlär tawışı. Xäzerge şäkertlärneñ tawışı yal kiçälärendä, bäyrämnärdä işetelmi diärlek. Ul arada Qazan studentları 14nçе fevral''dä bulaçaq ğaşıyklar bäyrämenä yäğni izge Valentın könenä äzerlänälär.

Albina Zäynulla

XS
SM
MD
LG