Accessibility links

шимбә, 3 декабрь 2016, Казан вакыты 18:42

Peterburda qorban mäclesläre niçek ütte?


Bu könnärdä bar möselman dönyasındağı kebek Peterburgta da qorban mäclesläre uzdı. Şähärneñ törle töbäklärendä, törle zallarında, törle keşelärneñ matdi yärdämnäre belän. Millättäşlärebezneñ üzläreneke genä dä, başqa möselmannar belän bergäläp tä. Elekke yıllardan ayırmalı bularaq, bıyıl berençe tapqır, zamança süz belän äytsäk, "image" mäclese uzdırıldı. Anıñ maqsatı - şähärdä yäşäwçe başqa dindäge xalıqlarğa qorban bäyrämeneñ mäğnäsen añlatu, tärtiben kürsätü, möselman dönyası belän tanıştıru.

Kiçäne uzdıru öçen tışqı bäyläneşlär komitetı şähärneñ iñ matur, bay binalarınıñ bersendä urın birde - mäcles Şualov sarayında uzdı. Anda şähär gubernatorı Valentina Matvienko, Qanunnar cıyılışınıñ törle komitetları räisläre, şähärneñ rayon xäkimiätläre başlıqları, törle milli oyışmalardan wäkillär qatnaştı. Cämiğ mäçeteneñ imam xatibı Cäfir xäzrät Ponçaevtan soñ gubernator Valentina Matvienko süz aldı: xalıqnı bäyräm belän qotladı.

Ä inde mäçetneñ üzendä millättäşlärebez öçen berniçä kön rättän, başqa zallarda da xäyriä aşları oyıştırıldı. İnjenrlıq-iqtisad universitetınıñ 150 keşe sıyışlı aşxanäsendä dä ike kön qorban aşı belän sıyladılar. Soñnan eçenä quldan yazılğan matur qotlaw otkrıtkaları salınğan küçtänäçlär öläştelär. Äytergä kiräk, küçtänäçlärne matdi yärdäm kürsätüçe şähärneñ iñ tanılğan eşquarları taratıp yörde. Mäclestä başlıça veterannar, blokadniklar ide - bik qänäğät bulıp taralıştılar. Ä inde öydän çığarğa mömkinçelekläre bulmağan qartlarğa, invalidlarğa bäyräm aşların, qorban iten adreslar buyınça iltep tapşırdılar.

Ğädättägeçä Peterburg xäyriä çaralarına Leningrad ölkäse tatarları da quşılıp kitte. Yäkşämbe könne Gatçinada yäşäwçe millättäşlärebez tabın cıydı. Üz xalqınnan tış Peterburg, Sosnovıy bor, Tosno häm başqa şähärlärdän dä qunaqlar çaqırıp. İñ küp xalıqnı, başlıça fäqirlärne, möğayın, "Äl-Fatx" isemle dini oyışma cıyğandır. Millättäşebez Ayrat Ğafurovnıñ "Olimp" kafesında 700läp törle millättäge din qardäşlärebez bäyräm aşı belän sıylandılar. Kitkändä härber möselmanğa qorban ite tapşırıldı.

Ä mäcles aldınnan bulğan töndä (22-sennän 23-yenä) oyıştıruçılarnıñ mäcles bulırına ışanıçları qalmağan ide. Leningrad ölkäsendä äzerlängän qorban ite töyälgän yök maşinasına militsiä arest sala. Oyıştıruçılarnıñ süzlärenä qarağanda, militsiä xezmätnärlären Cäfir xäzrät keşeläre kisätep quyğan bulğan. Wahabçılar cıyını öçen yök kilergä tieş dip. Yök maşinasın "Äl-Fatx" dini oyışma räise Xafiz xäzrät Mäxmüdineñ yortı yanında kötep toralar. Töne buyı tawış kütärep yörep, süze ütärlek keşelärne cälep itkäç kenä 20 sıyırnıñ iten möselmannarğa qaytarıp birälär.

Gölzada Kamalova, Peterburg

XS
SM
MD
LG