Accessibility links

чәршәмбе, 7 декабрь 2016, Казан вакыты 11:47

Yevropa Berlege häm anıñ Rusiägä qarata säyäsäte


Yevropa Berlegeneñ tışqı mönäsäbätlär komisarı Benita Ferrero-Waldner xanımnıñ süzlärençä, Berlek, Russiäneñ Ukraina häm Könyaq Kafkaz kebek kürşe illärgä üz xakimiäten tağu tırışlığına qarşı adımnar atlarğa tieş . Anıñ süzlärençä, Yevropa Berlege şuşı illär belän yaqınıraq mönäsäbät urnaştıraçaq. Ber ük vaqıtta Russiäne Yevropada İminlek häm Xezmättäşlek Oyışmasına küberäk cälep itärgä tırışaçaq.

Ukrainada Viktor Yukoşenkonıñ , ber yıl elegeräk Görcstanda Mixail Saakaşvilinıñ saylaularda ciñep çığuı Yevropa Berlege öçen kötelmägän küreneş buldı. Ul ike citäkçeneñ dä yaqınıraq mönäsäbätlär buldıru telägenä häm Russiä belän konfrontatsiä ixtimallığına äzer tügel ide. Yevropa Berlegeneñ tışqı mönäsäbätlär komisarı Benita Ferrefo-Waldnerneñ Yevropa Parlamentınıñ tışqı mönäsäbätlär komitetındağı diskussiäsendä dä töp tema Russiä häm Ukraina buldı. Ferrero-Waldnerneñ süzlärençä, Russiä Yevropa Berlegeneñ Ukraina, Moldova häm Belorusqa qarata säyäsäte Mäskävneñ täsiren kimetügä yünältelgän dip bäyälämäskä tieş.

Audio

"Bez Russiäneñ yaña bäysez dävlätlärgä qarata centekläp äzerängän tışqı säysäteneñ buluına tanıqbız. Xäzer bez Russiäne üzeneñ blok mantığın üzgärtüe öçen tırışırğa tieşbez. Bez Russineñ Yevropa Berlegeneñ kürşe illärgä qarata xezmättäşlegenä qarata saqlanu pozitsiäsen beterü yulların ezlävgä berençel ähämiät birergä tieşbez. Bu älbättä Ukrainağa ğına tügel, ä Moldova häm Belorusqa da qarıy."

Ferrero-Waldnerneñ süzlärneçä, Yevropa Berlege öçen Russiä möhim strategik partner bulıp qala birsä dä, Yevropa Berlege Russiägä berdäm pozitsiädä toruın kürsätkän nıqlı kündermä dä cibärergä tieş. Bu inde ağza illär arasında Rusisägä mönäsäbät mäsäläsendä ayırmalıqlarnı beterergä kiräk digän süz. Komisar Sişämbedäge diskussiädä Yevropa Berlege bu ölkädä Yevropada İminlek häm Xezmättäşlek Oyışması belän yaqınnan xezmättäşlek itärgä tieş, çönki oyışmal älegäçä Russiä häm anıñ kürşeläre belän bäyläneşle mäsälälär tikşerelgän töp forum bulıp tora dip belderde. Ul şulay uq Yevropa Berlege uzğanda Könyaq Osetiä, Abxaziä häm Moldova konfliktlarına da xäl çarası tabu öçen bik tırışsa da, politik teläk citärlek bulmadı häm Yevropa Berlege ber tauıştan söylämäde dip belderde. Yevropa Berlegeneñ tışqı säysäteneñ kordinatorı Havier Solana isä, ber kön elegeräk Yevropa Berlege regiondağı konfliktlarda turıdan-turı rol uynamayaçaq dip belderde. Ferrero-Waldner Mart ayında Mäskävgä vizit yasıyaçağın häm Russiäne xezmättäşlekkä etärü öçen sabırlı bulırğa kiräklegen dä äytte.

Audio

"Bez täsire zonasına keräbez dip uylağan Russiä öçen vazğiätneñ ciñel bulmauın añlıybız. Läkin, bu illärneñ bezgä yünälüe dä möhim. Bu kürşelär säyäsäteneñ nigezen täşkil itä. Bu ölkädä aqırın ğına bulsa da alğa kiteş bulır dip ömetlänäbez."

Yevropa Berlege Ukraina kebek illärneñ ağzalığı mäsäläsendä üz säyäsäten äle bilgelämäde. Ferrero-Waldner pragmatik häm realistik mönäsäbät kürsätergä çaqırdı. Ul Yevropa Berlegeneñ Ukrainağa älegä ağzalıq täqdim itärgä ciınmauın añlarğa birde. Yevropa berlegeneñ töp kileşüendä, Yevropanıñ här ile ağzalıq öçen möräcäğät itä ala dielsä dä, Yevropa ile cäğräfik mäğnädä genä qullanılmıy.

Färit İdelle, Praga.
XS
SM
MD
LG