Accessibility links

шимбә, 10 декабрь 2016, Казан вакыты 21:39

Tatarstan turistlarına 2005 yılda «Qazan İzge ana ikonası ezlärennän» barırğa täqdim itälär


Qatı salqınnar waqıtında da Qazannıñ turistik şirkätläre eşsez utırmıy. Bigräk tä yaña yıl aldınnan, qışqı bäyrämnär waqıtında aqçaları bulğan Tatarstanlılar, cılı yaqlarğa kitü yağın qaradı. Tatarstan yaqlarına isä turistlar kübesençä cäyge waqıtlarda kilä. Tatarstannıñ 200läp turistik firma arasında küpçege töp iğtibarnı turistlarnı respublikadan çitkä cibärügä yünältä. Ämma Tatarstannıñ eçke bazarında eşläwçelär dä bar. Küpme keşe kilgän häm küpmese çitkä kitkän älegä belep bulmıy. Tögäl mäğlümatlarnı Däwlät statistika komitetı cäygä taba ğına iğlan itäçäk. Yıl näticälären beler öçen turizm öçen cawaplı ministrlıqqa möräcäğät ittek. Andağı belgeçlär bezgä Tatarstannıñ turizmın üsterü öçen nindi eş alıp baruları turında söylädelär. Mäsälän, bu yılda, Eçke turistik kompleksnı üsterü programması raslanırğa tieş. Elekke programmanıñ waqıtı tämamlanıp kilä ikän inde. Şulay uq, ministrlıqnıñ turizm öçen cawaplı bülege turistik şirkätlär arasında bäyge ütkärgän ikän. «21nçe ğasır turizmı» digän bäyge 2004 yılnıñ axırında tämamlanğan bulğan. Anıñ yolmaqları da bilgele. Bäygene oyıştıruçılar, 2004 yılda eçke häm tışqı turizm belän şöğellänüçe iñ yaxşı şirkätne açıqlarğa telägän. Şunıñ belän bergä, yarışta sport, yal, sälämätländerü, balıqçılıq häm awçılıq, yäşlär häm balalar yalı, mädäni, çit il keşeläre öçen, etnik häm başqa yünäleştäge iñ yaxşı marşrut bilgelänergä tieş bulğan. Bäygedä qatnaşuçılar Qazannıñ 1000 yıllığına bağışlanğan maxsus turnı da täqdim itkän. Tışqı turizm yünäleşendä eşläwçe şirtkätlär küp, ä menä respublika eçendäge maturlıqlarğa keşene cälep itü belän, şundıy uq däräcädä eşlägän şirkät tabılmağan. Eçke turizm ölkäsendä eşläwçe häm bäygedä şartların cawap birgän turistik firma tabılmağan. Marşrut häm säyäxätlär belän xällär yaxşıraq ikän. Tatarstan şirkätläre turistlarğa milli yünäleştäge säyäxätlärne täqdim itä ala. Mäsälän, ber turistik oyışa, «Könçığış qunaqçılığı : yaña yılnı borınğı Qazanda qarşılaw» kebek proyekt belän bäygedä ciñgän. İkençe ber şirkät «Bolğar buylap mädäni häm tarixi ekskursiä»ne täqdim itä. 2004ynınıñ iñ yaxşı ekskursiäse itep, milli muzey täqdim itkän, Ciñüneñ 60 yıllığına bağışlanğan maxsus programma tanılğan. Ä Qazannıñ 1000 yıllığına bağışlağan maxsus säyäxät ürnäge itep, ministrlıq ütkärgän bäygedä, «Qazan İzge ana ikonası ezlärennän baru» digän proyekt ciñgän. İkençe ber şirkät 2004 yılda «Xan xäzinäse» digän sport yarışları häm ekstremal yäşäw şartları bulğan uyın belän tanıldı. Bu proyekt uñışlı kilep çıqqan, qayber mäğlümatlarğa qarağanda, «Xan xäzinäse»uyınıñ ikençe kisäge dä ütkäreläçäk. Qazannıñ 1000 yıllığına bağışlanğan 2005 yılda turistik şirkätlär qunaqlarnıñ küpläp kielüenä ömetlänä. Qazanda qunaqxanälär tözelä, milli aş restorannarı açıldı, tatar milli suvenirlar äzerläwgä dä küp iğtibar birelä başladı. Ämma älegä, turistik şirkät belgeçläre äytüençä, bu kiläçäkkä investitsiä bulıp tora. Yubiley yılı başlansa da, barıber, çitkä kitüçelär, kilüçelärgä qarağanda kübräk.

Bikä Timerova.

XS
SM
MD
LG