Accessibility links

Кайнар хәбәр

Miting ğälämätläre Tatarstan parlamentına da ütep kerde.


Tatarstan Däwlät Şurasınıñ yazğı sessiäse, ildä barğan säyer reformalar kiterep çığarğan kierenkelek wäzğıäte kebek ük, säyer häm kierenke başlanıp kitte. Yazğı sessiäneñ sekretariatın raslağanda, kommunistlar fraksiäse citäkçese Aleksandr Saliynıñ, aldan kileşelgän bulsa da, särkätiplek äğzäse buludan baş tartuı, sessiä utırışında qatnaşuçı prezident Mintimer Şäymievneñ anı, deputat wazifaların ütäwdän çitläşüdä ğayepläp, oyaltuı säyer buldı. Kierenkelek deputat Aleksandr Ştaninnıñ kön tärtibenä, küptän raslanğan häm ğinwar ayınnan ğämälgä kertelgän, toraq-kommunal' xucalıq reforması turındağı qanunnı yañadan qarap, tözätmälär kertüne täqdim itüennän başlandı. Ul monetizatsiä reforması ütkärgändä, federal' üzäk tarafınnan, keşelärneñ layıklı tormış itügä bulğan, konstitutsion xoquqları bozıluı häm xalıqnıñ moña qarşı çığuınnan sabaq alırğa çaqırdı. Anıñ fikerençä, toraq-kommunal' xucalıq reforması xalıqnıñ tormış däräcäsen tağın da tübänäytäçäk häm xalıq qarşılığınıñ ikençe dulqınıñ kiterep çığaraçaq. Däwlät Şurası räise Färit Möxämmätşin Ştanin fikeren xupladı, läkin toraq-kommunal' xucalıq reforması qanunnarın tieşle komitetta tağın ber tikşerep, bu mäsälägä fevral' azağında äylänep qaytırğa täqdim itte. Bügenge wäzğıättä bu mäsäläne tikşerügä kereşsäk, bezneñ utırış mitingqa äylänergä mömkin, dip kisätte. Deputatlar räis täqdimen xuplap tawış birdelär. Läkin bu mäs'älä buyınça sessiä utırışında keçkenä genä, yartı säğätlek kenä. “miting” bareber buldı. Ul prezident replikasınnan başlandı. Prezident parlamentnı kim digändä ezleksezlektä ğayepläde. Anıñ fikerençä, toraq-kommunal' xucalıq reforması Däwlät Şurasında waqıtında tikşerelgän, deputatlar anı raslağannar. Ütäwçe xakimiät reformanı başlawda zur eşlär başqarğan. Ä deputatlar äle berençe näticälärne kötmiçä, aldan qotqı çığaralar. Şulay un minut çaması tartqalaşqaç, deputat Ştaninğa qabat süz birelgäç, kierenkelek iñ yuğarı noqtasına citte. Prezident deputatlarnı qarşılıq aksiälärenä bitaraflıqta ğayeplägäç, “sanksiäsez miting” däwam itte. Deputat Tufan Miñnullin süz aldı häm deputatlarnıñ xalıq xälen beleşep toruların ireşterde. Şulay itep xalıq arasındağı kirenkelek Tatarstan parlamentına da ütep kerde. Ä Däwlät Şurasınıñ kön tärtibe bolay da kierenke, anda siksännän artıq mäs'älä quyılğan. İnde söylägänebezçä, mäs’älälärneñ mäs’äläse- monetizatsiä reformasına aşığıç räweştä kertelgän üzgäreşlärne qanunlaştıru. Sezgä bu xäbärne äzerlägän säğätlärdä, Däwlät Şurası äle şuşı mäs’älälärgä kereşkän genä ide. Däwlät Şurasınıñ yazğı sessiäseneñ unınçı utırışı näticälären aldağı xäbärlärebezdä ireştererbez, inşalla. Yunıs Ätnäle.

XS
SM
MD
LG