Accessibility links

дүшәмбе, 5 декабрь 2016, Казан вакыты 17:40

BMO İminlek Şurası Abxaziä belän Gruziäne söyläşülärne yañartırğa çaqıra


BMO İminlek Şurası Gruziä belän Abxaziäne yañadan söyläşülär östelenä qaytırğa çaqıra. Şura qabul itkän rezolüsiädä "totrıqsızlıq häm ışanıç buldıru öçen söyläşülärne yañartu zarur" dielgän. BMO wäkilläre kiläse ayda bu töbäkkä baraçaq.

Kiläse ayda Gruziä häm Abxaziägä Berläşkän Millätlär Oyışması wäkile Jean-Marie Guehenno baraçaq. İminlek Şurası tağın üz wäkillären cibärergä cıyına. İminlek Şurasında sişämbe könne qabul itelgän belderüdä küptän tügel Abxaziädä uzğan saylawlar telgä alınmadı, ämma tınıçlıq söyläşülären yañartırğa basım yasaw näq menä saylaw näticälärenä bäyle bulu şik tudırmıy.

İke taraf ta, Gruziädän ayırılıp çıqqan Abxaziäneñ yaña saylanğan prezidentı Sergei Bagapş häm Tbilisi, söyläşülärne yañartırğa teläk beldergän ide.

Söyläşülärne başlarğa çaqırğan rezolüsiäne İminlek Şurası prezidentı, Argentinanıñ BMOdağı ilçese Cesar Mayoral uqıp birde: "Şura äğzaläre İminlek Şurası rezolüsiäläre nigezendä nizaqqa säyäsi çişeleş tabu kiräklegenä basım yasıy, totrıqlılıq häm üzara ışanıç buldıru öçen ike yaqnıñ da tiz arada söyläşülärne yañartuına ömet belderä," dide Cesar Mayoral.

İminlek Şurası Abxaziäne Gruziäneñ ber öleşe bularaq qabul itä. Uzğan cäydä Abxaziä Gruziä belän böten elemtälärne özgän ide. Ämma dikaber ayında Gruziä häm BMO wäkilläre qatnaşında atnalıq oçraşularğa qatnaşa başladı.

BMO wäkile Heidi Tagliavini, soñğı aylarda Abxaziädä bulğan waqiğalärdän soñ ber kem dä kisken üzgäreşlär kötmi, dip belderde: "Abxaziä 3 aydan artıq säyäsi krizis kiçerde. Xalıqnıñ sabırlığı bette. Töbäktä kierenkelek arttı, minem fikeremçä, keşelär uzğan waqiğalärne señderergä tieş," dide Tagliavini.

İminlek Şurası diplomatları Azatlıq radiosına, General Sekretarneñ Gruziä dusları dip isemlängän törkem uzdıraçaq yuğarı däräcädäge söyläşülärgä zur ömetlär bağlana, dip söyläp birde.

Törkemgä kergän Rusiä, AQŞ häm Fransiä, Germaniä häm Britaniä diplomatları yaz başında Genevada Gruzin-Abxaz nizağı mäs''äläsendä oçraşırğa tieş. Sişämbe könne İminlek Şurası ike yaqnı da söyläşülärdä qatnaşırğa çaqırdı.

Ul arada Abxaziä prezidentı Sergei Bagapş, şul uq könne Mäskäwdä çaqta, Abxaziäneñ bäysez buluı telägen tağın ber tapqır qabatladı. İminlek Şurası belderüendä Gruziäneñ bäysezlege häm territorial bötenlege turında süz bara.

Bagapş, iqtisadi xezmättäşlekne arttıru – Suxumi belän Tbilisi arasındağı mönäsäbätlärne yaxşı yaqqa üzgärtä alır ide, dide.

Tagliavini, başta ike yaq ta iminlekne tä''min itergä tieş, soñınnan säyäsi söyläşülärgä dä yul açılır di. Anıñ fikerençä Bagapşnıñ nizaqlarnı çişü täcribäse bar: "Ul tınıçlıq söyläşülärendä qatnaşqan keşe, mäs''älä belän tanış. Bezneñ öçen dä ul belmägän keşe tügel, şunıñ öçen, söyläşülärdä urtaq tel tabılır, ul üze turıdan turı bulmasa da – söyläşülärdä qatnaşır dip uylıym," dude Tagliavini.

Comğa könne İminlek Şurası BMOnıñ tınıçlıq saqlaw köçlären Gruziädä tağın 6 ayğa qaldırırğa qarar qabul itäçäk dip kötelä. Xäzerge waqıtta anda 130 xärbi, alarnıñ 119nı – xärbi küzätüçelär häm tsivil polisiäneñ 11 xezmätkäre bar.

Alsu Qormaş
XS
SM
MD
LG