Accessibility links

пәнҗешәмбе, 8 декабрь 2016, Казан вакыты 17:14

Reforma östenä reforma çümälä


Şulay itep Tatarstan Däwlät Şurasınıñ uzğan utırışınıñ kön tärtibendäge töp mäs''älä- “Tatarstan Respublikasında xalıqqa adreslı sotsial'' yärdäm kürsätü turındağı qanunğa üzgäreşlär häm östämälär kertü” qanun proyektı buldı. Qanun proyektın vitse-premyer Zilä Wälieva täqdim itte. Üzgäreşlär häm östämälärneñ zarurilığın ul älege qanunnıñ qayber matdäläreneñ federal'' qanun belän täñgälläşterü häm aqçalata tüläwlärneñ, subsidiälärneñ bilgelängän külämen qanunilaştıru belän añlattı. Mäğlüm ki monetizatsiä reformasına qarşılıq aksiäläre başlanğaç Tatarstan xökümäte aşığıç räweştä reformanı “yomşartu” çaraları kürde. Mäs''älän barlıq kategoriä taşlamaçılarğa şähär transportına ike yöz sumlıq sotsial'' biletlar taratu qararı çığardı. Menä şulay, ut qapqanday aşığıç qabul itelgän qararlar, Däwlät Şurası sessiäse utırışında şulay uq aşığıç raslandılar. Qanun proyektı berençe uqılışta qabul itelde häm tulayım xuplandı. Qanun proyektın tulayım qabul itü kiläse utırışqa qaldırıldı. Çönki adreslı sotsial'' yärdäm qanunınıñ qayber matdäläreneñ federal'' qanunğa turı kilmäwenä Tatarstan prokurorı protestında tikşeräse bar. Qanunğa üzgäreşlär östämälärne finanslaw mäs’äläsenä dä açıqlıq kertergä kiräk. Aqçalata tüläwlärne häm subsidiälärne arttıruğa respublika qaznasınnan ber milliard ike million çaması östämä çığımnar taläp itä. Bu aqçalar byudjetta qaralmağan. Respublika citäkçelege çığımnarnı östämä keremnär xisabına qaplarğa niätli. Däwlät Şurasında toraq-kommunal'' xucalıq reformasında xalıqnı sotsial'' yaqlaw probleması turında da mäğlümät tıñlandı. Xökümät faraz itüençä respublikada öç yöz meñ keşeneñ fatir xaqınıñ reformada qaralğança yöz protsentın üz kesäsennän tülärgä öç yöz meñ keşeneñ xäle citmäyäçäk. Şuña kürä bu reformağa da byudjettan ber milliard cide yöz million sumlıq subsidya qaralğan.

Däwlät Şurasınıñ yazğı sessiäseneñ utırışında tağın ber reformağa qağılışlı mäs''älälär qaraldı. Bu cirle üzidarälär oyıştıru reforması. Respublikanıñ ütäwçe xakimiät strukturaların global'' üzgärtep qoru reformasına da bıyıl kereşäse. Şähärlärgä rayonnarğa möstäqillek, administratsiä citäkçelären saylap üzlärençä yäşäp yatarğa xoquq birüçe bu reforma ayırım ber tema. Uzğan utırışta deputatlar respublika rayonnarın munitsipal'' berämlek- munitsipal'' rayon itep üzgärtep qoru turındağı qanun proyektların ikençe häm qayber rayonnar buyınça öçençe uqılışta da qabul ittelär inde.

Yunıs Ätnäle

XS
SM
MD
LG