Accessibility links

җомга, 9 декабрь 2016, Казан вакыты 09:02

Qazan tuğrası häm bayrağı Rusiä däwlät registrında terkälde


Tatarstan däwlätçelegeneñ bilgeläre Rusiä däwlät registrında terkälde. Bu uñaydan Qazanda «Tatarstannıñ geral’dika ölkäsendäge däwlät säyäsäte» digän fänni konferensiä ütkärelde.

Belgänegezçä, Tatarstannıñ yäşelle, qızıllı häm aqlı bayrağı 1991yılda, tağın ber yıldan tuğra qabul itelä, ä 1993 yılda Tatarstannıñ gimnı barlıqqa kilä. Respublikanıñ Ğeraldika ölkäsendäge däwlät säyäsäte turında söylägändä, Däwlät şurası räise urınbasarı Rimma Ratnikova bolay dip äytte: « Tatarstan tuğarsı häm bayrağınıñ Rusiä däwlät Registrında terkälüen, bez däwlätçelek bilgeläre formalaşuınıñ tämamlanuı itep qabul itäbez». Tatarstan Prezidentı qarşındağı Geral’dik şura 2002 yılda barlıqqa kilde. Ul geral’dika ölkäsendäge däwlät säyäsäte konsepsiäsen tözü, däwlät simvolların qullanu tärtibe, rayon häm şähärlärneñ bilgelären buldıru kebek mäs’älälär belän şöğellänä. Tatarstannıñ här rayonı xäzer üz tuğrasın buldırğan. 2004 yılda Qazannıñ tuğrası häm bayrağı qabul itelde. Ä 27 ğinwarda Rusiä Prezidentı qarşındağı däwlät geraldika şurası wäkilläre, Qazan tuğrası häm bayrağın terkäw turında şahidätnamäne şähär başlığına tapşırdı. Ä moña qädär, Tatarstannıñ däwlät bilgeläre, tuğra, bayraq häm gimnı Rusiä geral’dik registrında terkäw xaqındağı dokumentnı Tatarstan Prezidentına tapşırdılar.

Tatarstannıñ räsmi däwlät bilgeläre bulsa da, alarnıñ däräcäse häm qullanu tärtibe mäs’äläsendä qıyınlıqlar bar. Konferensiädä çığış yasağan Yustitsiä ministrı Midxät Qormanov, Tatarstan häm Rusiä qanunnarı arasında qarşılıqlar barlı1ğın bilgeläp ütte. Mäsälän, mir sudyaları eşlägän cirdä Tatarstan bilgelären genä quyarğa röxsät itelmi, barı Rusiä bilgelär belän bergä genä. Şulay uq Midxät Qormanov, Rusiä geral’dik Şura räise Gennadiy Velinbaxoka Rusiä tuğrası turında da soraw birde. Ni säbäple, dönyawi däwlätneñ tuğrasında 7 täre räseme häm izge Georgiy surätlängän, dip soradı ul. Gennadiy Velinbaxov, Rusiä tuğrasındağı tärelär, pravoslav täre tügel, ä geral’dik xaclar ğına, häm türkologlar da bu räsem belän kileşte, dip cawap birde. Ä atta utıruçı keşe ul, İzge Georgiy räseme tügel, ä barı tik doşmannı ciñüçe suğışçı ğına, dip añlattı. Tatar internet forumnarda, töbäk citäkçeläre häm respublika başlıqları östän bilgelänä torğan bu zamanda däwlät bilgeläreneñ kiräge qalmıy, digän fiker belderelgän ide. Ämma älege fänni cıyında bu mäs’äläne telgä aluçı tabılmadı.



Bikä Timerova.

XS
SM
MD
LG