Accessibility links

якшәмбе, 11 декабрь 2016, Казан вакыты 15:01

Qazannıñ meñyıllığına bez dä äzerlänäbez


Sverdlov ölkäseneñ Ärtä rayonı, Äceğol awılında bu könnärdä Qazannıñ 1000 yıllığına bağışlanğan kürgäzmä-bäyge iğlan itelde. Kürgäzmäneñ isemen “Balalar icatında tatar fol'klorı” dip atarğa buldılar. “Kübäläk” isemle Äceğol balalar fol'klor ansamble citäkçese Ğäliä xanım Zäynullina başlanğıçı belän başlanğan bu eşne ansambl'gä yörüçe balalar häm alarnıñ äti-äniläre bik xuplap qarşı aldılar. Awılnıñ mädäniät yortı binasında kürgäzmä yasaw öçen böten ber zal bilgelände. Biregä tarixi märkäzebez Qazan şähärenä, anıñ tarixına bağışlanğan iñ yaxşı inşalar, referatlar, räsemnär, milli kiem ürnäkläre, bişeklär häm bişek cırları, tatar milläteneñ asılın, anıñ tarixi üzençäleklären, ğöref-ğadätlärebezne çağıldıra torğan küp törle başqa äyberlär quyılaçaq.

“Kübäläk” balaları häm Äceğol mäktäbe uquçıları inde bik birelep bäygegä äzerlänä dä başladılar. Bäyge turında rayon gazetasına iğlan birelde. Rayondağı başqa mäktäplär dä bu eşkä quşılır dip kötelä. Ä inde kürgäzmä äzer bulğaç, anı täqdir itü kiçäsen ütkärü, bäygedä ciñüçelärne büläkläw kebek çaralarnı uzdıruğa Yekaterinburgta eşläp kilüçe Milli Media-Xoldnng citäkçeläre yärdäm itärgä süz birdelär.

Qazannıñ meñyıllığına äzerlänü töbäklärdä yäşäwçe tatarlarnıñ ğına tügel, bar xalıqnıñ da iğtibar üzägendä tora. Tatarstannıñ Uraldağı daimi wäkile Rawil' Bikbovqa küptän tügel “21 ğasır ğailäse” dip atalğan ictimaği oyışma prezidentı Larisa Dokuçaeva häm Ural geneologiä oyışması redaktorı Emiliä Kalistratova möräcäğät ittelär. Moña qädär alarnıñ Ural töbägendä yäşäwçe ataqlı näsel zatlarınıñ tamırın öyränä torğan proyektları bulğan inde. Bu yulı alar Ural tatarları näselläre forumı ütkärü täqdime belän kilgännär. Älege forumnı alar Qazannıñ meñyıllığına bağışlap oyıştırırğa täqdim itälär.

Küptän tügel Yekaterinburgta xalıqara bilgele şäxes, ataqlı sovet fotoxudojniğı Maqs Penson icatına bağışlanğan kiçä bulıp uzdı. Bik küp ğömere Üzbäkstanda ütep, icatınıñ iñ asıl äyberläre üzbäklärneñ milli tormışın çağıldıra torğan bu xudojniknıñ eşlären Yekaterinburgqa Üzbäkstan delegatsiäse alıp kilde. Delegatsiä sostavında ike tatar keşese dä bar ide. Alarnıñ berse – “Älfiä” isemle art-galereya citäkçese Älfiä xanım häm şärıq stilendäge keramik äyberlär ostası Röstäm Usmanov. Kiçägä quyılğan yuğarı sänğät kürgäzmälären kürsätergä bulışuçı Tatarstannıñ atqazanğan artistkası, diktor Fäyrüzä Mäsğüt buldı. Kiçädä Üzbäkstan ilçese, Sverdlov ölkäse xökümäte wäkilläre häm Tatarstannıñ Uraldağı daimi wäkile Rawil' Bikbov qatnaştılar.

Fäwiä Safiullina.

Yekaternnburg.

XS
SM
MD
LG