Bu atnada, internet forumnarnıñ bersendä «Tatarstan yaña ğasır» sputnik kanalında çıqqan «Mädäniät dönyasında» digän tapşırunı tikşerdelär. Forumçılarnıñ ber öleşe üzläreneñ kritik belderülären bastırıp barğanda, ikençe öleşe tapşırunı qaramadıq, bäyä birä almıybız, dip yazdılar. Çit ildäge ber forumçı, dönya küläm däräcädä käyef töşererlek äyber turında söylägänçe, ğorurlanırlıq misallar xaqında fiker alışıyq, digän täqdim kertte. Qatı tänqit utına eläkkän «Mädäniät dönyası» tapşıruı tatar cırlarına, alarnı tekstlarına, estradağa, andağı artistlarğa, alarnıñ häm avtorlarnı mönäsäbätlärenä bağışlanğan ide. Bu söyläşüdä çittäge tatarlar da qatnaştı. Çönki Finländiädä, Amerikadağı tatarlar internet aşa «Tatar radiosı»n häm başqa FM-radiolarnı tıñlap tatar estradasın küz aldına kiterä ala. Bälkem kiläçäktä, tatar muzıkası xaqında fiker alışularda başqa millät keşeläre dä qatnaşa alır. Alda telgä alınğan forumçı, tatarica.com digän internet radionı tıñlarğa çaqırdı. Anda cırlar, muzıka tatarnıqı yañğırıy, alıp baruçı inglizçä häm gel tatarlar turında söyli www.tatarica.com säxifäsen buldırğan häm tapşırular açıp cibärgän keşe, Amerikadağı tatar kompozitorı Mäsxüdä Şämsetdinova dip xäbär itelde. Anda täwlek buyı tatar kompozitorlarnı äsärläre yañğırap tora, dip tä iğlan itelde. Bu radioğa bez dä totaşıp qaradıq.
Anda tatar muzıkası belän bergä Könçığış, Aziä köyläre dä yañğırıy bulıp çıqtı. Waqıt-waqıt Mäsxüdä Şämsetdinova ingliz telendä tatarlar, Qazan xanlığı, tarixi säxifälär, mädäniät, arxitektura, Kreml, Qol Şarif mäçete turında mäğlümat birä. Quray da işetelä anda. Alıp baruçı xanım qısqa häm ozın koylär, xalıq cırları turında fänni citdilek belän söyli, cırlarnıñ qısqaça eçtälegen dä añlatıp birä. www.tatarica.com säxifäsendä Mäsxüdä xanımnıñ CD tälinkäsen dä satıp alırğa täqdim itä. Anıñ iseme «Tatar rävayätläre», bäyäse -10$ tiräse. Ä «Tatarica» radiosın buşlay tıñlarğa bula. Anıñ öçen barı tik internetqa çığu mömkinlege kiräk. Ul waqıtta, Amerika häm Avstraliädä utırıp ta, İlham Şakirov başqaruındağı «Qara urman» belän xozurlanırğa mömkin. Adresnı qabatlıym www.tatarica.com.Küptän tügel zamança tatar muzıkası, Dj-lar, yaña muzikal proyektlar, tatar klubları turında ber internet säxifäse açıldı. İseme www.tatmusic.ru. «Tatarica» radiosınnan ayırmalı bularaq, biredä traditsion muzıkadan yaraq bulğan, zamança, qabatlanmas, yaña törkemnär, cırlar häm muzıkantlar turında yazalar. Adresnı qabatlıym tatmusic.ru. Ämma ber genä yağı añlaşılmıy, säxifäne yasawçılar tatar estradası muzıkası turında borçılıp yazalar, ämma tatarça tekstlar öçen säxifädä urın tabılmağan.
Bikä Timerova.
