Accessibility links

җомга, 9 декабрь 2016, Казан вакыты 01:09

<br>Tatarstan matbuğatına atnalıq küzätü


Bu atnada Qazanda çığuçı gazetlalarda üzençälekle mäqälälär az bulmadı. Üzeneñ 85 yäşlegen ütkärgän "Tatarstan yäşläre"neñ pänceşämbe sanında ber qısqa ğına xäbär bar. Berençe bittä basılğan bu mäqäläne tulısınça uqıp çığabız. 2004 yılda Qazanda 11.111 bala tuğan. Şul uq waqıtta 15.988 keşe yaqtı dönya belän xuşlaşqan. Ber yıl eçendä 7.561 par quşılğan, 4469 ğailä tarqalğan. Mäqälä şunıñ belän tämam, avtorı kürsätelmägän. Mäğnäsen här keşe üze uylarğa tieş dip sanıy “Tatarstan yäşläre”.

“Watanım Tatarstan”da 26 ğinwardа Yevropa berlege quyınına kerep baruçı Törkiäneñ rusiälelärgä närsä wäğdä itüe turında Gölgenä Lotfullinanıñ mäqäläse bar. Ägär dä Törkiä Yevropa berlegenä kersä, bez yaratqan ataqlı kurortlarnıñ qimmätlänüe häm ike aradağı viza rejimınıñ yuqqa çığuı ixtimal dip sanıy avtor.

Başqa qızıqlı yazmalarda tuqtalıp tormastan “Mädäni comğa” gazetasınıñ bu atna çığarılışındağı “Korrupsiä zaman çireme?” mäqäläsenä tuqtalıyq. Alabuğa şähärennän Fänis Xäkimov häm Firdäwes Xucin korrupsiä turında külämle yazma äzerlägän. Anda Rusiädäge baylar häm urtaça aylıq keremnäre yäşäw minimumınnan da kimräk bulğannarı turında statistik mäğlümat, korrupsiä töşençäseneñ mäğnäse, korrupsiäneñ Rusiädä barlıqqa kilüneñ säbäpläre, qaysı tarmaqlarda kiñ taraluı häm däwlät citäkçeläre korrupsiägä qarşı alıp barğan eşläre xaqında äytelä. Putin ğına tügel, Şäymiev tä Däwlät Sovetı sessiäsendä cinayätçelek häm korrupsiägä qarşı köräşne köçäytü turında süz quzğatqan ide. Anıñ iskärtüençä, respublikada här altınçı cinayät iqtisat belän bäylängän, 424 iqtisadi cinayät çinovniklar tarafınnan eşlängän. Bu sannar älege küreneşneñ öske öleşen genä kürsätä. Tärtip saqlawçılar nigezdä waq faktlar belän genä eş itä, zurraq türälärne isä cawapqa tartu yuq diärlek, ä bit alar aşa iñ möhim, xälitkeç qararlar ütä dielä älege mäqälädä.

Matbuğat közgese tapşıruınıñ axırında “Mäğrifät” gazetında xäzerge iñ modalı temağa yazılğan xat belän qısqaça tanıştırabız. Estrada cırçıları, bigräk tä xatın-qızlar artıq çişenep taşladılar, dielä bu xatta. Şul turıda Möxämmät päyğämbärneñ ber xädise kiterelgän. “Yarım şärä xatınnar cännätkä kerü tügel, anıñ isen dä tatımayaçaqlar”, dip yazılğan. Şuşı aktual'' temağa iğtibar birmäwçe ul cırçılar nişläp alay cännätneñ tatlı ise turında aldan qayğırtmıylar ikän, digän soraw tua.

Albina Zäynulla, Gölnaz İlgizär
XS
SM
MD
LG