Accessibility links

чәршәмбе, 7 декабрь 2016, Казан вакыты 19:19

Köç qullanuğa qaramastan ğiraqlılar saylawlarğa kilde


Tawış birü köne ildä bäyräm käyefe, häm ber ük waqıtta qorbannar belän bilgelände. İlneñ törle şähärlärendä bulğan intixar höcümnäre näticäsendä kimendä 22 keşe hälak buldı.

Şiği möselmannarı öçen izge sanalğan Najaf şähärendä tawış birergä kilgän xatın-qız bügenge könne "ciñü köne" dip atadı.

BMO general sekretare Kofi Annan''nıñ wäkile Aşraf Qazi, saylawlar irekle häm ğadel uzdı, Ğiraq xalqıneñ saylaw xoquqın ütärgä telägen çağıldırdı, dip belderde.

Saylaw urınnarınıñ 99%tı eşlägän. Berniçäse genä iminlek säbäpläre yä eşlärgä keşe bulmawı arqasında açılmıy qalğan.

Ğiraqnıñ Bäysez Saylaw Komissiäseneñ matbuğat wäkile Adel al-Lami, Ğiraqta saylawlarğa terkälgän xalıqnıñ 72%tı kilde, dip xäbär itte.

Bügen Ğiraqta kim digändä 22 keşe hälak buldı. Bağdadnıñ könçığışında saylaw urınında intixar höcüme buldı. İlneñ sönni töbäklärendä tawış birüneñ niçek uzğanı älegä bilgesez. Mäğlüm bulğança sönnilärneñ qayber törkemnäre saylawlarğa barmasqa çaqırğan ide.

Şiğilär Ğiraq xalqınıñ 60%tın täşkil itkängä, Milli Mäclestä dä alar küpçelektä bulaçaq dip farazlana. Distä yıllarça däwam itkän ezärleklänüdän soñ şiğilär yañadan säyäsi köçkä iä bulaçaq.

Ğiraqnıñ waqıtlı prezidentı Ğazi al-Yawar, Azatlıq radiosınıñ Ğiraq redaksiäsenä birgän äñgämäsendä, bügenge saylawlarnı "tawış birüçelär häm alarnı tuqtatırğa telägän "terrorçılar" arasındağı köräş" dip atadı: "Ğiraq xalqınıñ teläge terrornı ciñäçäk. Bez, här ğiraqlı moña qatnaşabız. Ber kem dä qanunnan östen tügel, çığarma tügel. Bu ildä qanun başqa barlıq äyberlärdän dä östen, inşalla," dide Ğiraq prezidentı.

Amerikan häm Ğiraq räsmiläre saylawlarnı – yaña demokratik xökümätkä berençe adım, dip bäyäläde. Bügen saylanğan Milli Mäcles Ğiraqnıñ kiläse yaña xökümäten saylayaçaq, Saddam çorınnan soñğı berençe konstitusiäneñ yazıluın küzätäçäk. Bügen Ğiraq xalqı 275 äğzalek Milli Mäclesne, şulay uq 18 provinsiädä cirle mäcleslärne sayladı. Tönyaq Ğiraqtağı kördlär töbägendä avtoniom parlament saylawları da uzdı. häm Ğiraqtan äle genä kilgän xäbärlärgä qarağanda bügen anda Britaniäneñ zur yök taşuçı oçqıçı häläkäte bulğan.

Alsu Qormaş
XS
SM
MD
LG