Accessibility links

якшәмбе, 11 декабрь 2016, Казан вакыты 03:24

Qazanda dönya çempionı iseme öçen köräş bara


6 köngä Qazan dönya däräcäsendäge sport märkäzenä äylände. Bendi dönya çempionatı, 30 ğinwar kiçendä, tantanalı räweştä başlanıp kitte. İnde yäkşämbe könne uq, Finländiä belän Kazaxstan, Şvetsiä belän Norvegiä, Rusiä belän Amerika komandaları uynadı. Amerika

2004 yıl çempionatı Şvetsiä ütkän bulğan. Bıyılğısı – Qazanda uza häm başqalanıñ meñ yıllığa bağışlana. Xalıqara Tuplı xokkey federatsiäse 2005 yılğı çempionatnı Rusiädä ütkärergä, dip inde 2 yıl elek xäl itkän. Şul waqıttan birle, respublika citäkçelege belän çempionatnı tieşle däräcädä uzdıru turında söyläşülär bara. Ä moña qädär, Amerika bendy federatsiäse Qazan şähär xakimiäte belän, çempionatlarnıñ bersen Tatarstanda uzdıru turında söyläşkän bulğan. Şulay itep, Qazan tuplı xokkey dönya çempionatın qabul itte. Andıy däräcäle yarışlarnı qabul itär öçen, Qazanğa küp aqça totıp, äzerlänergä turı kilde. Därwişlär bistäsendäge stadionda yaña cihazlar alındı, ul tözekländerelde,anda yaxşı boz cäyelde. Qazandağı Gorkiy parkındağı stadion häm anıñ bozlığı da, azmı küpme uynarlıq däräcägä kiterelde. 6 ğinwarğa qädär, şuşı ike bozlıqta, köndä 3-4 uyın ütkärelä. 31 ğinwarda könneñ berençe yartısında, 2nçe bozlıqta Estoniä belän Belorussiä komandaları uynadı. Estonnar 5:18 xisabı belän ottırdı. Soñınnan, matbuğat oçraşuında Estoniä delegatsiäseneñ başlığı Yuorgen Ant äfände, ni säbäple şulay uynağanın añlattı. Yuorgen äfände äytkänçä, Estoniädä tuplı xokkey belän şöğellänü 2003 yılda ğına başlanıp kitä. Bu keçkenä däwlätneñ yasalma boz belän däräcäle uyınnar ütkärergä aqçası yuq, şuña sportçılar kübesençä Finländiä häm Şvetsiägä ömet itä. Bu däwlätlär uyınçılarğa forma alıp birä, başqa yaqtan da yärdäm qulın suza. Ämma Estoniä komandasında uyınçılar 30 yäştän ölkänräk häm kübese, sportnıñ başqa törlärennän kilgän. Belorussiä komandası baş trenerı Nikolay Solovyev ta, tuplı xokkey komandası uynçılarnıñ kübese ğädäti xokkeyda çarlanğan buluın belderde. Belrusiä komandası tübänräk däräcäle «B» törkemendä äydäp baruçı komanda bulıp sanala. «A» törkemenä yuğarıraq professional däräcädä uynawçılar kerä. Anda ciñü öçen Rusiä, Şwetsiä, Finländiäğä, AQŞ komandaları köräşä. 6 fevral könne final uyın ütkäreläçäk häm anda ciñgän il wäkilläre dönya çempionı isemen yörtäçäk.

Tatarstan komandasınıñ da çempionatta üzen kürsätergä mömkinlek bar. 3 fevral könne, Dönya häm Tatarstan cıyılma komandaları arasında, Qazannıñ 1000 yıllığına bağışlanğan iptäşlärçä uyın ütkäreläçäk.

Bikä Timerova.

XS
SM
MD
LG