Accessibility links

шимбә, 10 декабрь 2016, Казан вакыты 23:35

Qazanda Cirle üzidarä häm regional’ üseş firkäse oyıştırıluı turında belderelde


Şimbä könne Qazan milli-mädäni üzägenä bulaçaq cıyılışqa Tatar ictimaği üzäge tatar xalqı zıyalıların, milli cämäğätçelekne çaqırsa da, anda qatnaşuçılar arasında çuaş, mari xalqınıñ milli oyışmaları wäkilläre dä buldı. Çönki älege cıyın Tatar xalqınıñ bügengese häm kiläçäge dip atalsa da, oyıştıruçılar fikerençä, Rusiädä yäşäwçe millätlär aldında torğan problemalar ber häm alarnı çişü yulların da bar xalıqlarğa bergäläp ezlärgä kiräk. Älege cıyınnıñ maqsatları, anda qaralğan mäs’älälär xaqında Azatlıq radiosı tıñlawçılarına cıyılışta qatnaşqan Färit Urazaev söyli.

Tizdän Rusiädä yaña cirle üzidarä qanunnarı eşli başlayaçaq. Şuşını istä totıp, urınnarda xalıqlarğa zıyan kilmäsen, yaña şartlarda xalıqnıñ, millätlärneñ xällären yaxşırtu niätennän, cirle üzidarälärgä bulaçaq saylawlarda xalıq aktiv qatnaşıp, anıñ mänfäğätlären yaqlağan keşelärne saylaw maqsatınnan Cirle üzidarä häm regional’ üseş firkäsen buldıru kiräklege turında äytelde. Bu fiker Tatarstannıñ milli oyışmalarınnan ğına tügel, ä İdel häm Ural buyı xalıqlarınıñ milli oyışmaları tarafınnan da xuplandı. Çönki bu problema alarğa da qağıla. Kiläçäktä bu ölkädä xalıq belän mäğlümät çaraları aşa da alıp barılaçaq

29 ğinwarda uzğan cıyılışta Idel-Uralbuyı xalıqları assotsiatsiäse häm Tatarstan cämäğätçelege tarafınnan imzalanğan möräcäğät tä qabul itelde. Anda xalıqnıñ, bigräk tä, zıyalılarnıñ qanun çığaru eşendä aktiv qatnaşuı, Rusiäneñ İctimaği palatası häm başqa organnarınıñ eşçänlegendä xalıqnıñ iñ layıqlı wäkilläreneñ qatnaşuı kiräklege turında äytelä.

Şulay uq cıyında Üzidarä häm regional’ üseş firkäseneñ oyıştıru törkeme dä buldırılğan. Yaqın arada Firkälär turındağı qanun nigezendä oyıştıru törkeme firkäneñ qorıltayın uzdıru, töbäklärdä anıñ filialların buldıru östendä eşläyäçäk. Törkemgä Mars Şämsetdinov, Raşat Safin, Tatar ictimaği üzäge, mari, çuaş häm başqa İdel-Uralbuyın xalıqlarınıñ milli oyışmaları wäkilläre kergän.

Gölnaz İlgizär

XS
SM
MD
LG