Accessibility links

якшәмбе, 4 декабрь 2016, Казан вакыты 09:12

Tatarstannıñ Uraldağı daimi wäkile Kurgan ölkäse gubernatorı belän oçraştı


Kurgan ölkäse gubernatorı Oleg Bogomolov çaqıruı buyınça, Tatarstannıñ Uraldağı daimi wäkile Ravil Bikbov küptän tügel Kurganda bulıp qayttı.

Gubernator belän oçraşu waqıtında Kurgan ölkäse belän Tatarstan respublikası arasındağı bäyläneşlärne sıyfat yağınnan yuğarıraq däräcägä kütärü mä’säläläre qaraldı.

Uzğan yılnıñ dekaber axırında ğına bulıp uzğan gubernator saylawlarında xalıq ışanıçın tağın ber tapqır qazanğan Oleg Bogomolov, ölkäneñ yaña strategik üseş yulın bilgelägändä, Tatarstan täcribäsen dä iskä alıp, respublika belän tığız elemtädä eşlärgä teläk belderde. Oçraşuda gubernator xakimiäte wäkilläre, ölkäneñ törle tarmaq citäkçeläre qatnaştı. Tatarstan belän üzara xezmättäşlek mömkinçelekläre här tarmaq buyınça bäyenä-bäynä qaraldı.

Kurgan ölkäsen kübräk awıl xucalığı töbäge dip atarğa bula. Xalıqnıñ 45 protsentı biredä awıl xucalığı belän mäşğül. Ural aryağı keşe başına it häm söt citeşterü buyınça Rusiä subyektları arasında berençe biş urın arasında, börteklelär citeşterüdä il buylap unbişençe urında tora. Şuña qaramastan, ağroxucalıqlarnıñ 80 protsentı bölgenlek xälendä. Uñdırışlı cirlär küp, ämma anı eşkärtergä yaña köçlär, yaña investorlar kiräk. Awıl xucalığın üsterüdä Tatarstan täcribäsen öyränü bik äybät bulır ide. Gubernator Oleg Bogomolov Tatarstan Respublikası prezidentı Mintimer Şäymiev belän oçraşırğa teläk belderde. “Qazannıñ meñyıllığı bar xalıq bäyräme. Bu böyek waqiğağa Kurgan ölkäse dä xäldän kilgänçä qatnaşa alır ide”, - di ul. İke töbäk arasındağı bäyläneşlärne yaña basqıçqa kütärü ısulları belän bergä, Oleg Bogomolov prezident belän Qazannıñ meñyıllığında qatnaşu mä’sälälären dä xäl itü turında da söyläşergä cıyına.

Gubernator belän oçraşqannan soñ, Ravil Bikbov şähärneñ milli häm dini üzägendä Bötendönya tatar kongressınıñ Kurgan ölkäse bülege räise Mars Wäliev häm ölkä möselmannarınıñ Qazıylat idäräse räise Rafail Ğaliullin belän oçraştı. Oçraşuda Kurgan ölkäse tatarlarınıñ milli tormışı turında süz alıp barıldı. Mars äfände Tatarstan wäkilen kongress bülegeneñ berençe kvartalğa häm yartı yıllıqqa bulğan plannarı belän tanıştırdı. Bulaçaq çaralar arasında Qazannıñ meñyıllığına äzerlänü, ölkädä TNV sputnik telekanalı tapşıruların kürsätä torğan sputnik antennalar urnaştırunı däwam itü, tatar mäğärifen üsterü buyınça eşlär küp urınnı alıp tora. Bu uñaydan qunaqnı tatar tele däreslären uqıtuçı Naciä xanımnıñ açıq däreslärenä dä alıp kerdelär.

Ozaqlamıy biredä tatar tele buyınça olimpiadalar ütkäreläçäk ikän. Qazannan kilgän ğalimnär belän bergä fevral'dä tatar tele uqıtuçılarınıñ belemen kütärü buyınça eş alıp barılaçaq. Tatar tele häm ädäbiät däreslekläre häm metodik äsbaplar belän tä'min itü kebek mäs'älälärdä gubernatornıñ dini häm milli eşlär buyınça yärdämçese Vladimir Ufimsev eş inde cayğa salınğan dip belderde.

Söyläşülär azağında kongress bülege citäkçese Mars Wäliev Tatarstannıñ Uraldağı daimi wäkillege belän tığız elemtädä eşläw Kurgan ölkäse tatarlarınıñ milli üseşenä uñay yoğıntı yasar digän ışanıç belderde.

Fäwiä Safiullina.

Yekaterinburg

XS
SM
MD
LG