Accessibility links

Кайнар хәбәр

Ğiraqta uzğan saylawlarda qatnaşuçılarnıñ sanı kötelgännän yuğarıraq buldı


Ğiraqnıñ Bäysez Saylaw Komissiäse, kiçä uzğan saylawlarda terkälgän 14 million keşeneñ 57%tı qatnaştı, Bu san kötelgännän dä yuğarıraq, dip belderde. Ämma sönni töbäkläredä tawış birüçelärneñ sanı tübän buluına borçılalar. Bügen Bağdadta uzğan matbuğat oçraşuında ilneñ waqıtlı premyer-ministr Ayad Allawi, ğiraqlılarnı, qarşılıqlarnı çitkä quyıp ilne tözekländerü eşendä berläşergä çaqırdı. Üz çiratında ul, wazifasında qalğan ber-niçä atna eçendä, ildäge azçılıqlarnıñ yaña xökümättä wäkilläre bulsın öçen çaralar küräçägen äytte: "Bügennän başlap, iğlan itäm. Şuşı wazifada qalğan könnäremne min yaña xökümättä här ğiraqlınıñ wäkile bulsın öçen çaralar küräçäkmen," dide Allawi. İlneñ törle şähärlärendä bulğan höcümnärdä kimendä 40 keşe hälak buldı. BMO, Yevropa Komissiäse, AQŞ, Germaniä, Fransiä, Britaniä häm Rusiä Ğiraq saylawların xupladı, tawış birüne – demokratiäneñ ciñüe häm döres yünäleştä yasalğan adım, dip bäyäläde. Polşa saqlanu ministrı Jerzy Szmajdzinski, saylawlar ildän xalıqara xärbi köçlärne çığarunı tizlätä ala, dip belderde. Ğiraq öçen xäzer üz köçlären tuplaw häm cihazlandıru möhim, dip östäde ul.
XS
SM
MD
LG