Accessibility links

сишәмбе, 6 декабрь 2016, Казан вакыты 06:05

George Bush: "Yaqın Könçığışnı demokratiäläşterü xialı tormışqa aşarlıq"


Pänceşämbegä qarşı töndä Amerika Quşma Ştatları prezidentı George Bush Kongressnıñ urtaq utırışında üzeneñ çirattağı yıllıq yullaması belän çığış yasadı. Anda ul, Washingtonnıñ Ğiraqtağı uñışların telgä alıp, bar Yaqın Könçığışta irekle cämğiat urnaştıru kiräklege turında belderde häm şul töbäktäge qayber illärne terrornı yaqlawdan waz kiçärgä öndäde. Yaqın Könçığışta ireklek urnaştırunı Bush nindi çaralar yardämendä alıp barırğa cıyına, monısı açıq itep belderelmäde.

Amerikan prezidentları Kongress qarşında yasağan yıllıq yullamasında ğädättägeçä üzläreneñ yaqın kiläçäktä alıp baraçaq säyäsäten bilgeli. İkençe märtäbä saylanğan George Bushnıñ atnakiçkä qarşı yasağan çığışı da bu yaqtan qarağanda çığarma tügel ide. Belgeçälär fikerençä, Bushnıñ ikençe prezidentlığı üzägendä töp tışqı säyäsi maqsat bulıp bar Yaqın Könçığışta kiñ demokratik reformalar ütkärü toraçaq. Üzeneñ 40 minutlıq çığışın tämamlap Quşma Ştatlar prezidentı, Amerika ğömer buyı ireklekkä, xörriatkä omtıldı dip, bolay dide:

Audio, George Bush

"Quşma Ştatlarda qollıqnı beterü xial ğına ide - ämma ul çınğa aştı. Yevropanı faşizmnan azat itü dä xial ide - aña da ireşelde. İmperiäçel kommunizmnıñ tarqaluı da xial bulıp tordı - läkin ber könne ul da tormışqa aştı. Bezneñ buınnıñ da üz xialları bar häm bez dä alğa zur ışanıç belän barabız. Täñreneñ yulların belep bulmıy, ämma bez anıñ qaya taba baruın beläbez - ul ireklekkä taba bara" dip belderä amerikan prezidentı George Bush. Räsmi Washington, küptän tügel genä Ğiraqta, fälästin cirlärendä häm Äfğanstanda uzğan saylawlar bar möselman dönyasındağı demokratik täräqqiatne ruxlandırıp cibärer dip ömetlänä. Ämma moña Amerika üz yağınnan niçek tä''sir itärgä cıyına, Bush plannarına nindi çaralar yardämendä ireşergä teli - monısı älegä haman da qarañğı bulıp qala. Üz çığışında amerikan prezidentı İrannı dönyada terrornı yaqlağan berençe däwlät dip bäyäläde häm anı atom qoralları citeşterergä tırışuda ğäyepläde. Terrorizm belgeçe Michael Griffin fikerençä, Quşma Ştatlarnıñ Yaqın Könçığıştağı töp doşmanı sanalğan İran häm Süriä mäs''äläsendä prezident Bush bar mömkinleklärne açıq itep qaldırırğa teli.

Audio, Michael Griffin

"Min Bush köç qullanu yağına awışa dip uylamıym, minemçä, anıñ çığışında teşläwgä qarağanda erü kübräk. Minem iğtibarnı kübräk anıñ Mısır turında äytkän süzläre cälep itte - amerikan prezidentı "Mısırnıñ Yaqın Könçığıştağı solıxqa yul kürsätkän böyek wä ğorur xalqı xäzer Yaqın Könçığıştağı demokratiägä dä yulnı kürsätä ala" dip belderde. Minemçä, Mısır prezidentı Xösni Möbäräk monı berençe märtäbä işetä" di Michael Griffin. Quşma Ştatlar prezidentı üz ileneñ Yaqın Könçığıştağı başqa berektäşlären dä, kiñräk ireklekkä ireşügä omtılırğa öndäde. Ul, Mäğribtä, Ürdündä häm Bähräyndä reformalar däwam itär digän ömet belderde, Söğüd Ğäräbstanın, üz kiläçägen bilgeläwdä xalıqnıñ rolen arttıru eşendä canlıraq buluğa çaqırdı. Bush şulay uq ireklekkä ireşü eşendä İran xalqı belän dä bergä bulaçağın äytte. Läkin anıñ şuşı yöklämäne aludan tış tağın nindi çaralarğa bara aluı yänä bilgesez bulıp qaldı. Rimdäge Xalıqara eşlär institutı xezmätkäre Jean Pierre Darnis:

Audio, Jean Pierre Darnis

"İranğa kilgändä kiläçäktä ike genä mömkinlek qala - yä sez anda barıp alar üz bombasın citeştergänçe höcüm itäsez, yä sez diplomatik yulda qalasız. Häm min älegä amerikan citäkçelegeneñ nindi mömkinlekne saylawı xaqında berni dä äytä almıym" di Jean Pierre Darnis.

Kärim Kamal
XS
SM
MD
LG