Accessibility links

дүшәмбе, 5 декабрь 2016, Казан вакыты 23:52

Qartlıq «Şatlıq» ta da bula ikän


Balıq Bistäse rayonı Küki awılında 2003 yılnıñ 20 iyünennän birle byudjettan tış bulğan “Şatlıq” qartlar häm invalidlar yortı eşläp kilä. Tatar awılına xas äyber tügel dip äytergä aşıqmıyq. Zamanası şundıy bit- yalğızlar, qarusız qalğannar küp. Ä tatarlarda xäyriä yortları totu kiñ taralğan küreneş bulğan ul. Menä Küki awılında barlıqqa kilgän qartalar yortı da, tatarnıñ imanğa qaytuınıñ ber misalı kebek kürenä. Üz qartlarıbıznı çitkä cibärmibez bit.

Ä bu cämğıäwi qartlar yortınıñ açılu tarixı bolayraq. 2002 yılda Tatarstan respublikası külämendä ütkän “Cämäğät initsiativası” isemle bäygegä Balıq Bistäse rayonınıñ xalıqnı sotsial' yaqlaw bülege häm Küki cirle üzidarä sovetı qartlar yortı tözü turında proyekt äzerläp cibärä. Häm proyekt konkursta Gran- priga layıq bula. Däwlätneke bulmağan qartlar yortı buldıru öçen 75000 sum aqça bülep birelä. Älbättä, bu aqça ğına ike qatlı, elekke zamannarda Bay Säläxi torğan taşlandıq xälendäge binanı rätkä kertü öçen citep betmi. Barlıq toraq- kommunal' xezmätlär öçen çığımnar cirle üzidarä sovetı arqılı tülänelä. Binanı remontlaw, kiräkle cihazlarnı satıp alu iğänäçelär yärdäme häm cirle byudjet tarafınnan finanslana. “Şatlıq” ta yäşärgä şarlar tudıru öçen Balıq Bistäse rayon xakimiäte, sotsial' yärdäm kürsätü bülege häm iğänäçelärne quşıp östämä 67000 sum aqça cıyıla.

Bügengese köndä anda biş äbi häm ike babay yäşäp yata. Alarğa rayonnıñ sotsial' yärdäm kürsätü üzäge tarafınnan bilgeläp quyılğan öç sotsial' xezmätkär yärdäm kürsätä. Äytep ütelgänçä, qartlar yortı xalıqtan cıyılğan xäyriä häm iğänäçelär häm “Şatlıq” ta toruçı ölkännärneñ pensiäsennän 75% külämdä alınğan aqça xisabına yäşi. Monnan tış, awıl xalqı da yärdämnän taşlamıy. Mäsälän, Qorban ayında ğına da ölkännärgä awıl xalqı tarafımnan şaqtıy ğına qorban itläre, qorban aşlarınnan rizıqlar tapşırılğan. Sadaqa itep azıq-tölek, kiem- salımnardan da awıl xalqı öleş çığara. Monnan tış, Küki urta mäktäbe qartlar yortın bäräñge häm başqa kiräkle yäşelçä –ciläk cimeş belän tä'min itä.

Monda toruçı äbi-babaylarğa yäşäw öçen barlıq şartlar da bar, aşaw-eçü, ös-kiem, munça diseñme, härberse buldırılğan. Monnan tış bergäläp cıyılıp yomşaq urındıqlarğa utırıp televizor qararğa, kilgän qunaqlar belän aralaşırğa da maxsus bülmälär bar. Küki cirle üzidarä sovetı räise Mäwlä İsxakov süzlärenä qarağanda, älege yortqa yalğız qalğan qartlar ğömer kiçerä. Küki awılında tuıp üskän, ğömer kiçergän 1926нчы yılğı Xädiçä äbine genä alıyq, monda küçengänçe ul üz yortı belän torğan, kürşe-külännär aña söt-may kertep, idännären yuıp, käcälären qararğa bulışalar. Waqıt ütü belän Xädiçä äbineñ sälämätlege nıq qaqşıy, yünläp yöri almıy başlıy. Yänäşäsendä härdaim qarap torırlıq keşe kiräk bula. Tuğan tumaçalar yuq, kürşelärneñ üz mäşäqätläre baştan aşqan, xäle bik möşkel bula. Xädiçä äbi ğäziz yortınıñ täräzälärenä taqtalar qadaqlatıp, qapqasına yozaq elep qartlar yortına kilä. Säyerlege belän awıl xalqın cälep itkän, Tegermänlek awılınnan küçep kilgän yalğızı qalğan Ğäbdelbär babay köndezlären awıl buylap säyäxät itä, ä kiçlären üz yortına äwerelgän “Şatlıq”ta yänäşäsendägelärneñ küñel qılların siskändererlek cırların başqara. Mamadış rayonınıqı bulğan, ikençe gruppa invalid, 1934нче yılğı Miñneğäli ağanıñ da yazmışı “Şatlıq” belän bäylängän. Qartlar yortı açıluın işetügä rayon citäkçelärenä möräcäğät itä, ozaq ta ütmi ber yalğızı qalğan babaynı cılı oyağa kiterep quyalar. Alarnıñ kübeseneñ tormışları ayanıçlı, küplär öçen ğibrät alırlıq misal. Şuña da qaramastan yewroremont yasalğan älege binada yäşäwçelär qartlıq könnärendä yalğız bulmawlarına, cılı oyada torularına Xodayğa häm “Şatlıq”nı buldırğan keşelärgä räxmätläre iksez-çiksez.

Zur tırışlıq belän “Şatlıq” ölkännän häm invalidlar yortın buldıru proyektı tormışqa aşırıla. Awıl cirendä yortqa, yärdämgä moxtac bulğannarğa yärdäm kürsätü häm başqa sotsial' problemalar çişelä. Proyekt tulısı belän üzen aqlıy häm başqa rayonnarda älege tiptağı yortlarnı buldıru öçen ölge bulıp tora, di awıl üzidaräse räise Mäwlä İsxakov.

Rästäm İsxaqi.

XS
SM
MD
LG