Accessibility links

Кайнар хәбәр

Tatnet: «Tatarlar kilä» virtual tatar cämğiäte söyläşügä çaqıra


Bu atnada bezneñ xäbärçelär Qazan metrosında töşep, 2 stansiä arasın cäyäw ütep qaradı. Bu xaqta «Azatlıq» tapşırularında da işetkänsezder. Läkin internetı bulğan här kemneñ Qazan metrosın qarap çığu mömkinlege bar. Qazan metrosınıñ 3 teldä tatarça, inglizçä, urısça tekstlar belän säxifäse bar. Anda çığu öçen iñ ansat yul – ezlätü maşinası eşlätü. Ämma turı adres aşa da bu säxifäne tabıp bula. Başta www.kazantransport.by.ru saytın tabasız da, «Metro»bülegenä keräsez. Başta ber niçä süz älege sayt turında äytep kitik.

www.kazantransport.by.ru säxifäse Qazanğa kilergä cıyına torğan keşelär öçen ayıruça faydalı, biredä, avtobus, tramvay, su yulı belän dä niçek itep telägän cirgä barıp qaytu turında plan qorırğa. Bu säxifädä transportnıñ yörü tärtibe, marşrut, Qazan xaritası - barın da tabıp bula. Qazan metrosı tözelep betkäç, anıñ yörü tärtibe dä şuşı www.kazantrasport.by.ru säxifäsendä urın alırğa tieş, älegä internetta yörüçelärgä metro tözeleşeneñ barışın da küzätep barırğa ğına mömkin. Metronıñ saytın www.kazantrasport.by.ru/metro adresında tabırğa bula. Äytkänemçä, säxifädä 3 teldä, kergäç uq, tatarçamı, urısça yäki inglizçä uqırğa telisez, saylaw mömkinlege bar. Säxifädä Qazan metrosınıñ kiläçäktä yörü tärtibe, stansiälärneñ küreneşe, eşlär barışı xaqında mäğlümatnı tabıp bula. Kiläse yılnıñ avgustında ayırlırğa tieşle stansiälär isemlegen dä şunnan belep bula. Mäsälän, «Kreml uramı», «Tuqay maydanı»,«Sukonka bistäse», «Ämät awılı» stansiäläre, 2005 yılda eşli başlarğa tieş. Ä şul uq sızıqta bulğan, «Tawlıqlar» häm «Ciñü prospektı» stansiälären eşlätep cibärü 2007 yılğa ğına planlaştırılğan. Şähärneñ ikençe yağına suzılğan metro yullarınıñ eşli başlawı 2009-2013 yılğa ğına kötelä, barlığı eş planı 2029 yılğa qädär tözelgän. Ul waqıtta Qazannıñ barlıq rayonnarı ğına tügel, yaqın tirädäge awıl häm bistäläre dä ber çeltärgä totaşırğa tieş. Ğädäti metro poyezdları 3 yünäleştä yöriäçäk. Tağın, säxifädä ciñelçä metro turında da süz bara. Bu - cir östennän salına torğan timer yul. Anıñ da 3 botağı bulır, dip kötelä. Älege säxifädä inde tözelä başlağan tunnellärneñ räsemen tabarğa bula, tüläp yöri torğan qartalar häm Qazan 1000 yıllığın çağıldırğan maxsus metro jetonı räseme dä bar. İnde metronıñ tözelep betüen genä kötäse qaldı. Qazan metrosı turında mäğlümat, dönya şähärläreneñ metrolarına bağışlanğan saytta da bar. www.urbanrail.net digän säxifädä şul uq Qazan metrosın Yekaterinbur metrosı belän çağıştırıp bula. Yekaterinburğa mäsälän, 5 stansiä genä ğämäldä, tağın 2 metro botağın tözü äle planda ğına. Amerika şähärläre, mäsälän Waşingtonnıñ metro çeltäre 5 botaqtan tora . Ä «New –York» metrosında 9 botaq eşläp kilä. Mäskäwdä cir astı yulları 10 botaq bülenä bar. Tokio metrosında poyezdlar 12 törle yünäleştä yöri. Äytkänemçä, şuşılar belän ber rättän, www.urbanrail.net säxifäsendä Qazan metrosı turında da mäğlümat bar. İnde xäzer uq, Qazan mertosınıñ yörü tärtiben öyränä torırğa teläsägez www.kazantransport.by.ru/metro saytı aşa virtual säyäxätkä çığa alasız.

Poyezdğa utırıp qaya barabız disezme? Mäsälän tatar yäşläre cıyıla torğan cirgä yul totarğa mömkin. İnternet dönyasında iñ modalı urın xäzer – www.livejournal.com «JJ» yäki «Tere jurnal». Biredä yäşlär köndäleklären alıp bara, küñel töbendä bulğan fikerlären yazıp qaldıra, başqalar biregä kilep, sineñ köndälegeñne uqıp kitä ala. Tere jurnal säxifäsendä üz büleklären şaqtıy millättäşlär dä buldırğan. Buş waqıtlarda xikäyälär yazuçı Sabircannıñ häm Tatnetta iñ populyär keşelärneñ berse – Raxmetov äfändeneñ dä «Tere journal»da üz bitäre bar. Küptän tügel, şuşı www.livejournal.com xezmätendä tatarlar cämğiäte barlıqqa kilde. Şuşı törkemgä yäşlär «Tatarlar kilä» digän isem birgän häm barlıq keşelärgä tatarlarğa qağılışlı sorawlarnı birergä täqdim ittelär. İnde törkemdäge ber yazuğa da küz salyıq: «Mäskäw häm Piterbur tatarları tuğan tellären onıta baralar, çönki tuğan teldä aralaşu ğailädä dä, yäşlär arasında da yuq. «Tere jurnal»dan arı yäşlär qayda oçraşsın di, bu virtual cämğiätneñ barlıqqa kilüe bik yaxşı». «Tatarlar kilä» cämğiäteneñ adresı: www.livejournal.com/community/tatarlar/ .

Bikä Timerova.

XS
SM
MD
LG