Accessibility links

пәнҗешәмбе, 8 декабрь 2016, Казан вакыты 12:56

Tatar oyışmaların uramğa quıp çığardılar


Başqortstan Tatar cämägätçelek oyışmaları berlege uramda torıp qaldı. Tatar oyışmaların Ufa üzägendä biläp torğan eş urınnarınnan quıp çığardılar. Mäğlüm buluınça, uzğan yılnıñ cäyendä Başqortstan Tatar cämägätçelek oyışmaları berlegenä kergän unbiş oyışma wäkilläre Ufa üzägendäge Syurupa uramındağı ber binada arendağa eş bülmäläre alıp, anda bik yaxşı remont yasap, irkenläp eşli başlağan ide. Ämma küp tä ütmäde, tatar oyışmaların, törle säbäplär tabıp, bu bilägän urınnarınnan çığarırğa teläw omtılışları başlandı. İnde menä bu atnada Ufadağı nindider şäxsi ber saq xezmäte wäkilläre kilep, Tatar cämägätçelek oyışmaları üz eşçänlegen alıp barğan bülmälärne bikläp quydı häm işeklärenä piçät suqtı. Äle anda üzlären şäxsi saq xezmäte xezmätkärläre dip atawçı äzmäwerdäy yegetlär köne-töne saqta tora häm anda berkemne dä kertmi. Älege ğämälne Başqortstan tatar oyışmaları wäkilläre üzlärenä qarşı yünältelgän säyäsi ezärlekläwneñ ber çağılışı dip isäpli. Mäğlüm buluınça, soñğı ay yarımda Tatar cämägätçelek oyışmaları berlege Başqortstanda urınnardağı üzidärä başlıqların elekkeçä täğayınläp quyuğa qarşı çığıp, alarnı barı tik saylap quyunı ğına ğämälgä kertüçe referendum ütkärü öçen imzalar cıyuda qatnaşqan ide. Menä şuşı eşçänlek respubliknıñ räsmi xaqimiätlärenä oşap betmäde, küräseñ, dip belderä Başqortstan tatar xäräkäte liderları. Äle kilep tuğan kierenke xälgä Başqortstan Tatar ictimağıy üzäge räise Ayrat Ğiniätullinnıñ fikeren tıñlıyq.

(Ayrat)

Sez Başqortstan Tatar ictimağıy üzäge räise Ayrat Ğiniätullinnı tıñladığız. Ayrat äfände fikerençä, tatar oyışmalarınıñ eş urının bikläp quyu ul tatarğa qarşı yünälderelgän aqsiä tügel. «Bezneñ ofista referendumğa äzerlek ştabı da urnaşqan, – di Ayrat Ğiniätullin. Şulay bulğaç, bu ğämäl respublikta ältetrnativ referendumğa äzerlängän küp sanlı başqa oyışmalarnıñ da eşenä ayaq çalu bulıp tora». Respublik proqurorı wazıyfaların başqaruçı Mixäil Zelepuqin belän oçraşu äle kilep tuğan qarşılıqnı beterüdä näticä birerme-yuqmı, ul xaqta aldağı könnärdä bilgele bulır, möğayın. İñ ğäcäbe şul – räsmi xaqimiätlär tatar cämägätçelek oyışmaları utırğan bülmälärne bernindi añlatmalarsız häm aldan kisätülärsez, kötmägändä bikläp quyğan. Tatar milli xäräkäte liderları belderüençä, demoqratik cämğiättä mondıy eşne hiçyüğı berniçä kön aldan xäbär itep, keşeçä dä başqarıp bulır ide. Ä älegä Başqortstan tatar oyışmaları wäkilläre üzläreneñ köndälek eş-mäşäkätläre belän şöğellänü öçen xezmät urınınnan qolaq qaqtı. Ämma alar älege añlaşılmawçanlıqnıñ tiz arada xäl itelüenä ışanıç bağlıy.

XS
SM
MD
LG