Accessibility links

шимбә, 10 декабрь 2016, Казан вакыты 04:08

Yuliä Timoşenko Ukrainanıñ yaña premyer-ministrı itep raslandı


Comğada Ukraina parlamentı ilneñ yaña premyer-ministrı itep yaña prezident Viktor Yuçenkonıñ yaqın köräştäşe Yuliä Timoşenkonı bilgeläde. Tawış birü aldınnan deputatlarğa taratılğan programmasında ul rişwätçelekkä qarşı köräşüne, yäşäw şartların kütärüne häm Ukrainanıñ Yevropa Berlege belän äğzalıq söyläşüläre başlayaçağın wäğdä itkän ide.

Tarafdarları arasında Timoşenko çiksez soqlanu uyatsa, köndäşläre aña rişwätkä batqan satlıqcan dip kenä qarıy, ä üzen isä ul Joanne d''Arcqa tiñli. Yuliä Timoşenko şulay uq elekke prezident Kuçmanı "qızğılt taraqan" dip atawı belän dä tanılğan ide. Comğa könne Ukraina parlamentı anı küpçelek tawış belän ilneñ yaña premyer-ministrı itep rasladı.

Audio, Volodimir Litvin

Ukraina parlamentı citäkçese Volodimir Litvin tawış birü näticälären bäyän itä häm Timoşenkonı yaña premyer-ministr itep bilgelänüe belän qotlıy. Parlamentta barlığı 450 deputat bar, häm alarnıñ 373-e Yuliä Timoşenkonı yaqlap tawış birde. Üz köräştäşen Ukraina xökümäte başlığı urınına täqdim itkändä prezident Yuçenko aña zur ömetlär bağlawın äytkän ide.

Audio, Viktor Yuçenko

"Xalıq yaña xökümätneñ namuslı buluın häm soñğı 14 yılda kiçergän problemalarğa çişeleş taba aluın teli. İmanım kamil, alar şuşı maqsatlarğa ireşäçäk" di prezident Yuçenko premyer-ministr itep Yuliä Timoşenkonı täqdim itüe uñayınnan. Parlamenttağı tawış birü inde berniçä märtäbä kiçekterelgän ide, moña xökümätkä kemnärneñ kerüe mäs''äläsendä kilep tuğan qarşılıqlar säbäp buldı. Comğa töştän soñ alar xäl itelde häm üze raslanuğa Timoşenko şunda utırğan prezident belän bergä törle ministrlarnı bilgeläw turındağı färmannarnı da imzaladı. Berençe vitse-premyer itep Viktor Yuçenkonıñ ikençe köräştäşe Anatoli Kinah raslandı. Xökümätkä şulay uq elek oppozitsiädä torğan "Naşa Ukraina" berläşmäsen yaqlawçı sotsialistlar da kerde, alar eçke eşlär, mäğärif wä fän häm awıl xucalığı ministrlıqların citäkläyäçäk. Üz xökümäteneñ aldağı 5 yılğa programmasın bäyän itkändä Timoşenko şaqtıy kiñküläm radikal'' reformalar ütkärüne wäğdä itkän ide. Ul yäşäw şartların üsterüne, rişwätçelekkä qarşı köräş alıp barunı, Ukrainanı Yevropa Berlegenä yaqınaytunı küz aldında tota, ğomumän, xalıq mänfäğätlärennän çığıp eş itüne wäğdä itä:

Audio, Yuliä Timoşenko

"Bez keşelärdä, xökümät üze öçen genä tügel, ä ğadi xalıq problemaların çişü ölkäsendä dä, älegä xökümätne küzätep kenä torğan häm xäzer inde nindider näticälär dä kötkän xalıq öçen dä eşli ala digän ömet wä ışanıçnı uyattıq" di Ukrainanıñ yaña ğına raslanğan premyer-ministrı Yuliä Timoşenko. Şulay itep Kievtäge yaña citäkçelek yañaça eşläwne wäğdä itä. Bu ilneñ tışqı säyäsättäge östenleklären tamırdan bulmasa da, beraz üzgärtüne añlata. Timoşenko Rusiä Ukrainanıñ berençe häm iñ möhim partnerı dip beldersä dä, yaña xökümät Yevropa belän yaqınayuğa zur iğtibar biräçäk dip äytte.

Kärim Kamal
XS
SM
MD
LG