Accessibility links

җомга, 2 декабрь 2016, Казан вакыты 21:16

Rice: Amerikanıñ İran säyäsäte bar Yaqın Könçığışnı reformalaw kiräklegennän çığıp bilgelänä


Amerika Quşma Ştatlarınıñ yaña däwlät sekretare Condoleezza Rice üzeneñ şuşı wazifasında berençe çit säfären däwam itep şimbä könne qısqa ğına waqıtqa Pol''şada tuqtaldı häm annan Törkiägä yul aldı. Anda ul Rusiä tışqı eşlär ministrı Sergey Lavrov belän dä söyläşülär ütkäräçäk. Rice oçraşu waqıtında Rusiädäge demokratiäneñ bügenge xälenä borçıluın belderep, Mäskäwneñ İranğa atom omtılışlarına yardämen tuqtatu mäs''äläsen dä kütärer dip kötelä.

Ğomumän, Tährannıñ atom programması, Quşma Ştatlarnıñ İranğa qarata säyäsäte Condoleezza Rice säfäreneñ üzägendä tora diärgä bula. Ul Yevropağa İrannıñ keşe xoquqların bozuın häm üzendä atom qoralları buldırırğa tırışuın xökem itkän qırıs belderülär belän kilde. Londonda Rice şul qırıslığın beraz yomşartıp, Washingtonnıñ İranğa qarşı xärbi çaralar kürü planı yuq dip beldersä dä, soñraq Berlindä ul bolay dide:

Audio, Condoleezza Rice

"İran xökümäteneñ il eçendä dä, xalıqara mäydanda da üzen totışı bar dönya cämäğätçelegendä borçu uyata. Yaqın Könçığışnıñ reformalar häm üzgäreşlär kiräk bulğan ber töbäk ikänen añlawda xalıqara cämäğätçelek torğan sayın berläşä bara, min monı qabatlaw häm bu ölkädä eşläw mäs''äläsendä bernindi dä awırlıq kürmim" di Quşma Ştatlarnıñ yaña däwlät sekretare. Washington İranğa qarata säyäsäten şulay itep bar Yaqın Könçığışnı demokratiäläşterü tırışlığı maqsatınnan çığıp qora. Yevropada isä, ayırım alğanda, Germaniä, Britaniä häm Fransiädä töp iğtibar älegä Tährannıñ atom programması tiräsendäge kierenkelekne säyäsi wä diplomatik yullar aşa çişügä birelä. Berlindä Rice belän oçraşqannan soñ Germaniä kanslerı Gerhard Schroeder monı yänä qabatladı:

Audio, Gerhard Schroeder

"Min Germaniäneñ, Fransiä häm Britaniä belän bergä, härkemne dä qänäğätländererlek çişeleşkä ireşü maqsatında säyäsi wä diplomatik yuldan baru öçen barın da eşläyäçägen açıq itep äyttem. Älegä qädär kürelgän çaralar, minemçä, döres yünäleştä ide" di german kanslerı Gerhard Schroeder. Berük waqıtta ul, Washingtonnıñ İranda kiñräk demokratik üzgäreşlär taläp itüe Yevropanıñ şuşı tırışlıqlarına qurqınıç tudıra digän farazlarnı kire qaqtı. İran mäs''äläse Condoleezza Ricenıñ Törkiädä Rusiä tışqı eşlär ministrı Sergey Lavrov belän oçraşuı kön tärtibendä dä tora. Amerikan däwlät sekretare Mäskäwne yänä İrandağı Buşer atom qorılmasına yağulıq satu niätennän waz kiçügä öndär dip kötelä. Söyläşülärdäge ikençe, ämma ähämiate yağınnan töp mäs''älä bulıp Quşma Ştatlarnıñ Rusiädäge demokratiä torışı uñayınnan borçıluı tora. Rusiä belgeçe bulğan Rice, üz säfären başlar aldınnan, Mäskäwdäge üzäk xakimiat üz qulına çamadan tış qüwät tupladı dip, anda mäxkämälärneñ haman da bäysez eş itmäwenä borçıluın äytkän ide.

Kärim Kamal
XS
SM
MD
LG