Groznıy. Çeçnäneñ Mäskäw yaqlı prezidentı Alu Alxanov bügen, üzeneñ Şamil Basayev üleme turındağı xäbärlärne raslıy almawın belderde. Rusiäneñ "İnterfax" agentlığına ul, min monı raslıy da, kire qağa da almıym dip äytte. Şul uq "İnterfax" atna başlarında Abxaziädäge iminlek wäkilläre mäğlümatına tayanıp, Basayevnıñ ülüe ixtimal digän xäbär taratqan ide. Pänceşämbe könne isä Britaniäneñ 4-nçe telekanalı şuşı çäçän suğışçısı belän äñgämä kürsätte, anda Basayev Beslandağı tösle höcümne yänä qabatlarğa cıyınuı xaqında belderä. Ul üzeneñ şuşı eşçänlegen barı tik Rusiä üz ğäskärlären Çeçnädän çığarğan oçraqta ğına tuqtataçağın da äytä.
