Accessibility links

чәршәмбе, 7 декабрь 2016, Казан вакыты 19:30

"Cidelek" illäre "öçençe dönya"dağı qayber fäqir däwlätlärneñ burıç yögen yomşatırğa cıyına


Aldınğı industrial'' illärdän torğan "cidelek" törkemeneñ dönyadağı qayber fäqir illärneñ burıç yögen ciñeläytergä buluı turında, xörmätle tıñlawçılar. Şuşı "cidelek" illäreneñ finans ministrları üzläreneñ Londonda ütkän ike könlek oçraşuında tarixta berençe märtäbä ayırım däwlätlärneñ Dönya Bankı kebek xalıqara finans oyışmalardan alğan burıçların tulısınça kiçerü yulların ezliäçägen belderde.

Süz biredä yaqınça 70 milliard dollar aqça turında bara. Ministrlar şulay uq, bu uptım ilahi eşlänmiäçäk, här ilneñ oçrağı ayırım häm centekläp tikşereläçäk dip tä iskärtä. Dönya Bankı, Xalıqara Valuta Fondı belän bergä "Çamadan tış burıçqa batqan illär" proyektın äzerlägän ide, "cidelek"neñ burıçlarnı kiçerü programması şul törkemgä kergän illärgä qarayaçaq. Läkin anda qatnaşu, yäğni burıçlardan arınuda yardäm alu öçen fäqir illär üzlärendä iqtisadi reformalar ütkärergä tieş bulaçaq, "cidelek" kileşüendä bu ayırım bilgeläp ütelä. Britaniäneñ qazna başlığı Gordon Brown bu xaqta menä närsä di:

Audio, Gordon Brown

"Bez "Çamadan tış burıçqa batqan illär" isemlegendäge qayber däwlätlärneñ burıçın 100 procent kiçerüne telibez, bez mondıy täqdimne "cidelek" belderülärendä berençe märtäbä yasıybız" di Britaniäneñ qazna başlığı Gordon Brown. Brown şäxsän "cidelek"neñ finans ministrlarına östämä ber plan da täqdim itkän ide, anda ul Afrika illärenä yardäm kürsätü maqsatında aqça bazarında yıl sayın 50 milliard dollar tuplawnı, alar belän säwdädä törle taşlamalar kertüne alğa sörä. Ämma Brownnıñ şuşı planı älegä Quşma Ştatlar yağınnan yaqlaw tapmadı. Washington, britan ministrınıñ täqdime Quşma Ştatlarnıñ büdjet qoru taläplärenä turı kilmi dip belderä häm anıñ urınına burıçlarnı turıdan-turı kiçerüne häm Dönya Bankı birä torğan aqçanı ayırım grantlarğa äyländerüne täqdim itä. Quşma Ştatlarnıñ qazna sekretare urınbasarı John Taylor şimbä könne Londonda uzğan matbuğat oçraşuında Washington çamadan tış burıçqa batqan illärneñ fäqirlegen kimetü eşenä tuğrı bulıp qala dip belderde. Läkin "cidelek" illäre finans ministrlarınıñ atna azağında ireşkän şuşı kileşüenä qaramastan, qayber yardäm oyışmaları anıñ çınlap torıp ğämälgä aşuına şiklänep qarıy häm burıçlarnıñ 100 protsent kiçerelüenä zur şöbhä belderä. Älege mäs''älä industrial'' "cidelek" citäkçeläreneñ bıyıl cäy Britaniädä uzaçaq yuğarı däräcäle oçraşuında da qaralaçaq. Anda Britaniä, Kanada, Fransiä, Germaniä, İtaliä, Yaponiä, Quşma Ştatlar, yäğni "cidelek" illärennän tış Rusiä dä qatnaşaçaq.

Kärim Kamal
XS
SM
MD
LG