Accessibility links

чәршәмбе, 7 декабрь 2016, Казан вакыты 17:25

Tatar tele däresläre kürmägän balalar tatar tele uqıtuçısı bulırğa teli: Tömän ölkäse


Wağay rayonınıñ Qazanlı urta mäktäbendä tatar telen raspisaniädän sızıp taşlağannar. Bu xaqta 11 nçe sıynıfta uquçı Gölnara Musina äytte. Gölnara tatar telennän häm ädäbiätınnan uza torğan ölkä olipiadasına üzlegennän äzerlängän.Gölnara:Mäktäbebezdä tatar telen bötenläy uqımıybız. -Bötenläy uqımıysız?! Nişläp? -Qısqartular bara xäzer. -Niçänçe sıynıfqa qädär uqıdığız inde tatar telen? -10 nçı klassqa qädär tege yılnı bar ide. Bıyıl 10-11 lärdä bötenläy yuq. Olimpiadağa kilülär bik tä awır buldı. Çönki möstäqil genä äzerlärgä kiräk kiçen dä däreslärdän soñ. Apa yärdäm itä. Wağay rayonı Qazanlı urta mäktäbeneñ tatar tele häm ädäbiätı uqıtuçısı Asiä Zimağulowa: “Yuğarı- 10 nçı 11 nçe sıynıflarda tatar telen beterep, barı tik 2 säğät tatar ädäbiätı ğına qaldırğaç awırudan başım çıqmıy”,- di. -Bıyıldan başlap mäktäp administratsiäse qaramağına qalğaç, tatar tele yazmışı, bezneñ Qazanlı urta mäktäbendä qarşı tordı. Şulay itep min bik tä yılıym bu xälgä, tüzä almıy yörägem. Ber yıl buyı awırıym inde. Çönki, telebez betsä, millätebez dä betä bezneñ. Telebezne saqlap qalu bezneñ izge burıçıbız. Qızğanıçqa qarşı Wağay rayonınıñ Qarağay mäktäbendä, Qazanlı mäktäbendä mäktäp administratsiäse monı añlamıylar. Menä Tuğız mäktäben äyter idem min, İkençe Wağay mäktäben, Yurmı mäktäben äyter idem. Bu mäktäplärdä mäktäp direktorları böten köçlären quyıp tatar telen saqlap qalırğa tırışılar. -Awıl xalqı närsä dip äytä soñ? Alar riza meni mäktäpneñ şundıy qararı belän? -Awıl xalqı qurqa xäzer. Ata analar cıyılışlarğa kilmilär. Menä üzebezneñ mäktäbebez turında äytäm min. Teräk mäktäp bulıp torsaq ta, üzem MO (metodik berläşmä) citäkçese ber närsä eşlätä almadım. Mäktäp administratsiäse belän eşläp qaradım, eşlämädem tügel. Törleçä añlatırğa tırıştım. Läkin näticäse bulmadı. Rayono bezneñ metodkabinet podderjiwät itä. Añlıylar minem xälne. Şulay uq kürsätmä birä almıy. Wağay rayonınıñ barlıq tatar tele häm ädäbiätı uqıtuçıları üzläreneñ metodik berläşmälärendä xaqimiät başlığı Ramay Sönğatullinğa xat yazğannar. Niçek kenä bulsa da yuğarı sıynıflarda 3 säğätne saqlap qaluda yärdämen sorağannar. Ämma Asiä Zimağulowa süzlärençä, älegä qädär cawap ala almağannar. Bu problem turında bez Wağay rayon xaqimiäte başlığı Ramay Sönğatullin belän telefon aşa söyläştek. Ul säğätlärneñ qısqaruı turında belä ikän. Ämma xäzerge köndä, nindi fänne niçä säğät uqıtunı mäktäp citäkçelege häm äti-änilär xäl itkängä kürä, östän kürsätmä birüneñ urınlı bulmawın da añlıy. Qazanlı urta mäktäbendäge xälgä kilgändä, säğätlär bülü şäxsi mönäsäbätkä qorılğan buluwın da yäşermäde. Tatar tele häm ädäbiätı uqıtuçısı belän mäktäp citäkçelegeneñ urtaq tel tapmawı arqasında uqıtuçınıñ säğätläre qısqara, di rayon başlığı. Telefonnan söyläşkän waqıtta ul bu mäsäläne rayon mäğärif qomitetı belän centekläp tikşerergä süz birde. “Ämma 1 nçe sentäbrgä qädär mäktäp raspisaniäsenä barıber üzgäreş kertep bulmayaçaq. Raslanğan bit ul”,- dide. Äytkänemçä, Wağay rayonı Qazanlı awılınnan kilgän 11 nçe sıynıf uquçısı Gölnara Musina belän bez ölkä olimpiadasında oçraşıp söyläştek. Anıñ teläge mäktäpne betergäç yuğarı uqu yortına kerep tatar tele häm ädäbiätı uqıtuçısı belgeçlege alu. 2 nçe fevräldän 4 senä qädär Tömän şähärendä uzğan bu olimpiadada Gölnara ikençe urınnı aldı. Berençe urınnı 11 nçe sıynıflar arasında Aromaş rayonı Yaña Aptulla awılınnan kilgän Gölüsä Dautowağa birdelär.

Nail Alan,Tömän

XS
SM
MD
LG