Accessibility links

сишәмбе, 6 декабрь 2016, Казан вакыты 08:54

Bendy buyınça XXV dönya berençelegendä Şvetsiä ciñde


Ber atna däwamında, Dönya wäkilläreneñ bergäläp cıyılıp, aralaşıp, üz ara yarışıp yörğän waqıtları artta qaldı. Yäkşämbe könne tuplı xokkey buyınça dönya berençelege tämamlandı. Berençe urınnı Şvetsiä komandası aldı, Rusiälelär- ikençe, Kazaxstan xokkeyçıları öçençe urınnı aluğa ireşte. Şimbä könne, 3nçe urın öçen yarış buldı. Kazaxstan komandası Finnlandiä xokkeyçıları belän köräşte. Näticädä, Kazaxstanılar 5:3 isäbe belän ciñde häm bronza medal’en yawlap aldı. Şul uq, könne Kazaxstanılar Rusiä komandası belän köç sınaşıp qarağan ide. Ul waqıtta «Vodnik» klubı komandası 10:3 isäbe belän ciñde. Çempionatta şulay ciñel genä ciñep baru, Rusiä xokkeyçılarına, Şvetsiä komandası belän uynağanda qomaçaw itte, dip äytä belgeçlär. Şvetsiä belän Rusiä xokkeyçıları ostalıq yağınnan ber bersennän qalışmıy, şuña kürä, alarnıñ oçraşuı da, kierenke bardı häm ayıruça qızıqlı buldı.

Rusiä isemennän uynağan «Vodnik» klubı komandasına teläktäşlek kürsätergä dip, Tatarstanğa räsmi säfär belän kilgän Arxanğelski ölkäse gubernatorı Nikolay Keselev ta çaqırılğan ide. Ä şved uyınçılarnıñ küñelen kütärergä, dip Şvetsiä patşalığınıñ ilçese Yoğan Mullander äfände kilde. Şunıñ östäwenä Qazandağı iñ ere şved şirkäte İKEA kibete, çempionatqa finans yärdäm kürsätte. Şvetsiä xokkeyçıları bu çempionatta köçleräk bulıp çıqtı. Ber tapqır Rusiä komandasına ottırsa dä, finalda ciñügä ireşä aldılar. Final uyınıñ berençe öleşe şvedlar faydasın 5:1 isäbe belän tämamlandı. İkençe kisäktä, Rusiälelär tağın 1 tupnı ğına kertä aldılar. Uyın 5:2 isäbe belän bette. «Raketa» stadionında cıyılğan küpçelek canatarlarnıñ ömetläre aqlanmadı, Şvetsiä komandası çempion buldı. Uyınnan soñ Rusiä komandası trenerı Vladimir Yanko, xokkeyçılar qullarınnan kilgänen barın da eşläde, dide. Berniçä yıl buyı uñışqa ireşä almağan Rusiä komandası öçen dönya berençelegendä 2nçe urınnı alu da, bik awır buldı, dip söyläde ul matbuğat oçraşuında. Şvetsiä komandası baş trenerı, bezneñ komandada ayırım-ayırım yoldızlar yuq, anıñ urınına uyınçılar arasında berdämlek bar, dip beldergän bulğan. Çempion iseme bilgele bulğaç, tuplı xokkey, ikençe törle äytkändä Bendy uyını buyınça XXVnçe dönya berençelege tämamlandı. Yabılu tantanasında Tatarstannıñ räsmi keşeläre, respublika qunaqları qatnaştı. Qazandağı xokkey canatarları Rusiä komandası öçen söyensä, Şvedlarnıñ şatlığın Qazanda yäşäwçe millättäşläre urtaqlaştı. XXVnçe dönya çempionat tämamlandı. Läkin timer ayaqta şuarğa yaratuçı qazanlılar qayğırmıy. Şähärneñ ike stadionında bulğan yuğarı sıyfatlı bozlıqlar alar qaramağına küçte.

Bikä Timerova.

XS
SM
MD
LG