Accessibility links

дүшәмбе, 5 декабрь 2016, Казан вакыты 11:38

Qazanda Marat Mölekovnı iskä aldılar


Milli cämäğätçelek öçen bu düşämbe istälekle kön. Näq 75 yıl elek tatar milli xäräkäteneñ kürenekle liderı, Bötentatar ictimaği üzägeneñ berençe räise Marat Mölekov Tömän ölkäseneñ Yalutor rayonında dönyağa kilgän. Marat Mölekov perestroyka yıllarında ğomum demokratik häm milli üseş waqıtında qıyu häm aqıllı adımnarı belän millätkä yul kürsätkän keşe. Şimbä könne Tatar kongressı binasında Marat Mölekovnı iskä alu kiçäse buldı. Anda milli xäräkättä küptännän qatnaşuçılar - ğalimnär, mäğrifätçelär, jurnalistlar cıyıldı. Bu kiçä Bötentatar ictimaği üzäge täqdime buyınça oyıştırılğan ide. Xaris xäzrät Salixcan Marat Mölekovka bağışlap doğa uqığannan soñ, Tatar ictimaği üzäge citäkçelegendä küptännän bilgele Räşit Yäğfärov Marat Gabdrasul ulı Mölekovnıñ tormış yulı häm säyäsi eşçänlege belän tanıştırdı. Älege kiçäneñ türendä Marat äfändeneñ ulları – Röstäm häm İskändär çaqırılğan idelär. Ozaq yıllar deputat häm säyäsätçe bularaq bilgele Fändäs Safiullin üzeneñ Marat Mölekov belän bergä Däwlät Sovetında eşläwe turında söyläde. Möstäqillek iğlan itkän sessiä utırışınıñ protokol kenägäseneñ qayber yulları belän tanıştırıp, Fändäs Safiullin şuşı tarixi dokumentlar cıyıntığın Marat Mölekovnıñ ullarına tapşırdı.

Marat Mölekov xolqı, tırışlığı häm aqılı belän seber tatarı. Ğomum tatar milli ideyäsen kütärep çıqtı. Ul Qazanda yuğarı belem alğan, Piträç rayonında uqıtuçı, rayon gäcite redaktorı bulıp eşlägän, Qazan pedagogiä institutında häm Qazan universitetında säyäsi fännär uqıtqan. Tel, ädäbiät, tarix institutınıñ citäkçese bulğan Mirfatıx Zäkiev çığış yasadı.

İctimaği üzäk oyışqanda, tel, ädäbiät häm tarix institutınıñ binasında cıyıla ide. Häm anıñ citäkçeläre bulıp şuşı institutnıñ xezmätkärläre tanıldı.

Marat Mölekov turındağı üzeneñ xatiräläre häm millät yazmışları turında fikerläre belän Nail Tuqtamışev, Flera Äxmätova-Urmançı, Ğayal Mortazin, Damir İsxaqov, Yunıs Kamaletdinov, İldus Sadıyqov, Kärim Yauşev, Zöfär Säliev häm başqalar çığış yasadı. Jurnalist häm cämäğät eşleklese Marat Bariev Ğäli Aqışnıñ möräcäğäten uqıdı. Şağir Äxmät Räşitovnıñ çığışı millät häm ütkän xällär turındağı söyläşügä emotsional' tösmerlär birde.

Marat Mölekovnı iskä alğanda anı sağınu, milli xäräkättä oyıştıruçı häm keşe yaratuçı sabır liderlarnı sağınu ruxı östenlek itte. Bu söyläşüneñ ğibrätle urınnarı belän kiläçäktä sezne tağın tanıştırırbız. Kiçägä cıyıluçılar Marat Mölekovnıñ isemen mäñgeläşterü öçen Qazannıñ berär uramına anıñ isemen birergä täqdim ittelär.

Rimzil Wäli

XS
SM
MD
LG