Accessibility links

якшәмбе, 4 декабрь 2016, Казан вакыты 07:00

Rice: AQŞ Yaqın Könçığış tınıçlıq protsessında aktiv qatnaşaçaq


Condoleezza Rice AQŞ däwlät sekretarı bularaq yaqın könçığışqa yasağan berençe säfärendä taraflarnı ''mömkinçelek mizgele''nnän faydalanırğa çaqırdı. İzrael belän fälästinnär arasında tınıçlıq urnaşuı öçen AQŞnıñ yañadan tırışlıq kürsätäçägen beldergän Rice xanım yäkşämbedä İzrael premyere A.Sharon ä düşämbedä Ramallahta Fälästin prezidentı Mäxmüd Abbas belän oçraştı. Düşämbedä İzraeldän kitär aldınnan C.Rice ,AQŞnıñ tınıçlıq protsesı öçen iminlek koordinatorı bularaq general William Wardnıñ täğäyenlängänen belderde.

C.Rice bügen Tel Avivdän kitär aldınnan ütkärgän mätbuğat oçraşuında İzrael häm fälästin çitäkçeläreneñ Aqyortnıñ däğwäten qabul itkän buluların belderde

Rice(audio)

Prezident Bushnıñ Premyer Sharon häm prezident Abbasqa yazın oçraşu öçen cibärgän däğwätlären tapşırdım , alarnıñ här berse çaqırunı qabul itte. Yordaniä patşası Abdulla da mart ayında AQŞqa kiläçäk

Rice AQŞ dağwäte turında mäğlümät birmäsä dä, xabär agentlıqlarına qarağanda, amerikan räsmiläre ike citäkçe törle waqıtlarda kiläçäk dip äytkän. Rice bügen şulayuq AQŞnıñ general leytinant William Wardnı iminlek koordinatorı itep bilgeläwen beyan itte. Ward Abbasnıñ iminlek köçlären künegüdän ütkärü häm qorallandıru eşlärendä yardäm itäçäk. Düşämbedä Ramallahta prezident Abbas belän oçraşqannan soñ ütkärgän urtaq mätbuğat oçraşuında Rice Waşingtonnıñ kiläse 90 kön eçendä xezmät urınnarı buldıru, xosusi sektornı täräqi itterü infrastrukturanı yaxşırtu yäğni fälästinnärneñ tormışına şunduq uñay täsir yasau öçen 40million dollar yardäm biräçägen belderde. Ul yaqın könçığışta tınıçlıq urnaştrıu öçen AQŞ kiläse könnärdä aktiv qatnaşaçaq digän wäğdä birde. Riceneñ şuşı süzlärennän soñ, fälästinle jurnalist wäğdälärgä qaramastan sişämbedä Misırda ütäçäk Sharon-Abbas oçraşuına ni öçen AQŞ wäkilläre qatnaşmıy dip sorağaç, Rice İzrael, fälästinnär şulayuq öy xucası Misır häm Yordaniäneñ üz başlarına eş itüe möhim , kiräk bulğanda Amerika qatnaşaçaq dide. Däwlät sekretarı AQŞ iminlek koordinatorınıñ eşen bolay dip añlattı

Rice(audio)

AQŞnıñ iminlek koordinatorı fälästinnärneñ iminlek köçlären reformalauda cawaplı bulaçaq , küzätü eşlärendä yardäm itäçäk , ul taraflarnıñ aktivlıq häm tırışlıqların üz östenö almayaçaq. İzrael häm Fälästinnärneñ iminlek eşlärendä xezmättäşlege küpçelek problemalar belän eş itärlek köçle, nıq buluı möhim dip uylıym

İminlek koordinatorı itep bilgelängän general leytinant William Ward suğıştan sonğı Bosniada NATO totrıqlandıru köçläreneñ komandirı ä elegeräk ul Misır, Somalia Germaniä häm K.Koreada xezmät itte . C.Ricenıñ bügen Ramallahğa kilüe AQŞnıñ yaña Fälästin citäkçelegen raslaw bulıp tora.Bilgele bulğança Waşington Y.Arafatqa boykot belderep anıñ belän yıllarça ber nindi elemtägä kermäde. M.Abbasnıñ 4yıl däwam itkän häm meñnnärçä keşeneñ häläk buluına kitergän intifada-başkütärüne tuqtatırğa tırışuına Waşington yuğarı bäyä birä.Rice BBCgä birgän ängämädä dä moñı telgä aldı ämma ul terrornı tuqtatu öçen eşlänäse eşlär küp dide. Rice AQŞ tarafınnan yaqlanğan ''yul xaritası'' tınıçlıq planın canlandıru mäsäläsendä yähüd däwläte dä yöklämälären ütärgä tieş dip açıq itep äytte . A.Sharon M.Abbas,Misır citäkçese Möbäräk häm Yordaniä patşası Abdullanıñ qatnaşqan sişämbe summitın C.Rice alğa taba möhim adım dip bäyäläde . Färidä Xämit
XS
SM
MD
LG