Accessibility links

Кайнар хәбәр

Xalıqara tellär köne: bäyge däwam itä


21 fevral’ – Xalıqara ana telläre köne uñayınnan uza torğan Ana telläre aylığı respublika külämendä ütkärelsä, älege aylıq qısalarımdağı çaralarnıñ küp öleşe Qazanda uza älbättä. Şähär xakimiäte tözegän plan buyınça, başqalada 8 fevral könne mädäniät idäräse tarafınnan Tatarlarnıñ ğöref-ğädätlären beläseñme? dip isemlängän bäyge bulıp ütte. Anda balalar tatar xalqınıñ milli traditsiäläre, ğädät-yolaların belüdä köç sınaştı. Qazan däwlät universitetınıñ çit tellär institutında fänni-ğämäli konferensiä uzdı. Anda cıyılğan ğalimnär, uqıtuçılar mäktäptä çit tellärne öyrätüdä yaña texnologiälär turında fikerläştelär. Annan tış, aylıq qısalarında başqa qızıqlı çaralar da ütkärü qaralğan. Mäsälän, comğa könne Qayum Nasıriynıñ 180 yıllığına bağışlanğan Tatarnıñ tañ yoldızı dip isemlängän kitap kürgäzmäse açılaçaq. 19 fevraldä isä şähärneñ mäktäp citäkçeläre küptellelek şartlarında şäxesne tärbiäläw turında kiñäşläşäçäk. 24 isä tatar tele häm ädäbiäte uqıtuçıları uqıtu täcribäse belän urtaqlaşaçaq. Balalarnı kitapxanälärdä qızıqlı kitaplar kürgäzmäse, ana telen belü buyınça konkurslar, ana tele turında inşa bäygeläre dä kötä. Ana tele aylığında rus tele dä onıtılmağan. Rus millätle balalar öçen Rus tele bäyräme, iske rus kitapları turında äñgämälär, şulay uq telne belü buyınça törle bäygelär, kitap kürgäzmäläre ütkärü küzdä totıla. 17 fevral könne Qazan şähäre Şurasınıñ deputatları Xalıqara Ana tele könenä bağışlanğan cıyılışqa äzerlänälär.

Şunısı qızıq, Tatarstanda bik küp millätlär yäşäwgä dä qaramastan, Ana tele aylığında ütkäreläçäk çaralar isemlegendä nigäder barı tik tatar häm rus tellärenä qaralğannar ğına iskä alına. Qazan şähär xakimiätendä monı älege bäyrämgä respublikanıñ milli oyışmalarınıñ bitaraflığı belän añlatalar. Tatarstannıñ milli-mädäni oyışmalar Assotsiatsiäse, mäsälän, bernindi dä çaralar ütkärergä cıyınmıy ikän. Respublika mäğlümlät çaralarında da älegä Ana tele aylığına iğtibar bik küp tügel. Respublikanıñ Tatmedia agentlığı xezmätkärläre süzlärenä qarağanda, Tatarstanda näşer itelä torğan gäcit-jurnallarğa älege bäyräm xaqında mäğlümat birelgän. Läkin alar bu uñaydan närsä eşlärgä niätlänüläre turında informatsiä äle haman cıyılmağan. Bu xaqta tulıraq mäğlümat berniçä könnän genä bulır, dip belderdelär Tatmedia agentlığında.

Ana tele köne uñayınnan Azatlıq radiosı ütkärä torğan bäygegä kilgändä isä, bezgä inde cawaplar kilä başladı. Bez täqdim itkän süzlärgä tärcemälär Qazannan ğına tügel, ä respublikanıñ törle töbäklärennän dä kilä. Alay ğına da tügel, cawaplarnı xätta Tömännän dä şaltıratıp äyttelär. Daimi tıñlawçıbız Rawil Ğilfanov şulay yıraqta yäşäsä dä, ana telen onıtmağan häm konkursta bik teläp qatnaşuın belderde. Şulay itep, Azatlıq radiosınıñ bäygesendä qatnaşuçılarnıñ sanı arta, geografiäse kiñäyä bara. Sez dä bezneñ tärcemäçelär bäygesendä qatnaşırğa soñğa qalmağız. Tärcemä itärgä kiräk süzlärne yañadan isegezgä töşerep ütäm.

Cawaplarnı isä, azatlıq radiosınıñ qazan byurosına cibärergä mömkin. Monıñ öçen azatliq@azatliq.ru adresına elektron xat yä isä 420012 Qazan-12 155 abonent tartmasına ğadi xat yazarğa mömkin. Bezgä şaltıratırğa da mömkin. Telefonıbız 368102. Sezneñ cawaplarnı kötep qalabız.

Gölnaz İlgizär

XS
SM
MD
LG