Accessibility links

Кайнар хәбәр

Yekaterinurgta başqort telendä spektakl


Küptän tügel Yekaterinburg şähäre başqortları häm tatarları tormışında üzençälekle waqiğa bulıp uzdı. Şähärneñ mädäniät saraylarınıñ bersendä başqort telendä Käbir Aqbaşovnıñ “Sipkelle qız” digän spektakle quyıldı. Spektakl'ne Sverdlov ölkä başqort mädäni üzäge qanatı astında oyıştırılğan “Yadkär” isemle başqort drama kollektivı säxnägä quydı. Üzeşçän häwäskärlärneñ uynawın xalıq bik yaratıp qaradı.

Tatar häm başqort mädäniäte tormışında milli konsertlar ğädäti xäl. Ä menä tuğan telneñ maturlığın tamaşaçığa citkerä ala torğan, syujet waqiğalarına ürep, tormıştağı aktual' temalarnı yaqtırta torğan iñ töp, iñ qatlawlı çaralarnıñ berse bulğan milli teatr oyıştıru bik qıyu adım. Bez başqort milli üzäge citäkçese Fäymä xanım Yosıpovağa kollektivnıñ tarixı turında söyläwen sorap möräcäğät ittek.

- “Teatr sänğäten balaçaqtan uq yaratqanğa kürä, min küptän inde Yekaterinburg qalasında teatr kollektivı oyıştıru maqsatı belän yäşädem. Qorıltay eşläre, cämğiät eşläre üsä başlağaç, bu mömkin buldı. Sänğätkä ğaşıyk keşelär, bez berençe tapqır şuşı Yelizavet mädäniät sarayına berençe tapqır 2000nçe yılda cıyıldıq. 2001nçe yılda, Sverdlov ölkä mädäniätı festivale qısalarında “Qız urlaw” dip atalğan berençe spektaklebezne quydıq”, - dip söyläde ul.

Fäymä xanım üze spektakl'dä töp rol'lärneñ bersen başqara. Äytergä kiräk, bik osta uynıy. Ğomumän, naçar uynıy dip äyterlek beräw dä yuq aralarında. “Sipkelle qız” – kollektiv säxnägä quyğan ikençe spektakl' ikän. Xäzerge köndä kollektiv Böyek Ciñü könenä bağışlap “Ul qayttı” digän spektakl' äzerli.

Spektakl'lärne säxnägä quyuçı rejisser – Başqortstannıñ atqazanğan mädäniät xezmätkäre Säydä Soltanova. Ul üze Başqortstanda yäşäsä dä, kollektiv çaqıruı buyınça biregä daimi räweştä kilep yöri. Fäymä xanımnıñ aña räxmäte bik zur. Üze citäklägän kollektiv turında da fikere bik yuğarı Fäymä xanımnıñ.

Şunısı quanıçlı, kollektivta yäşlär küp. Ul ğına da tügel, alar bik çista itep başqort telendä aralaşalar. Spektakl'lär çın başqort telendä, yuğarı däräcädä quyıla.

Yäşlärneñ şulay itep çın küñeldän qatnaşıp yörüläre bik quanıçlı küreneş. 25 yäşlek Fänil digän yeget monıñ säbäben bik ğadi itep añlattı. “Üzem başqort bulğaç, qärdäşlärem belän tuğan teldä aralaşırğa räxätlänep yörim, - di ul, - Üz qanıñ tarta bit”.

“Yadkär” drama kollektivı Yekaterinburg şähäreneñ Yelizavet mädäniät sarayı urnaşqan Çkalov rayonı xakimiätendä dä, Sverdlov ölkä ministrlıysında da bilgele törkem. Şähär külämendä, ölkä külämendä uzdırılğan ğomumi çaralarğa gel çaqırıp toralar alarnı. Mart ayında kollektiv üzeneñ biş yıllıq yubileyın bilgeläp ütärgä cıyına. Yubiley çaraların 26 mart – Räsäy teatrı könenä turı kiterep uzdırırğa uylıylar.

Fäwiä Safiullina.

Yekaterinburg.

XS
SM
MD
LG