Qazanğa çirattağı qunaqlar kilde. Bu yulı – İran däwlätennän. İrannıñ yarlılar waqıfı citäkçese respublikağa Tatneft’ şirkäte wäkilläre belän oçraşır öçen kilde. Süz İranda urtaq räweştä neft’ çığarunı oyıştıru turında baraçaq, dip xäbär itä İntertat elektron gäcite. Sişämbe könne isä respublika Däwlät Şurasınıñ räise Färit Möxämmätşin Şvetsiäneñ Rusiädäge ilçese belän oçraşıp söyläşte. Şulay uq Tatarstan spikerı jurnalistlar belän dä oçraşıp, Rusiä xökümäten otstavkağa cibärü turındağı mäs’älägä üz fikerlären belderde. Färit Möxämmätşin fikerençä, başlanğan reformalar axırına citkerelergä tieş, mondıy şartlarda xökümätne alıştırunıñ näticäse bulmaçaraq. Xäyer, qayber ministrlar, xökümät äğzäläre buyınça başqa fikerlär dä bulırğa mömkin, dip belderde ul. Ä premyer-ministr urınbasarı Zilä Wälieva isä, zur eş başqarğanda xökümäte yäki ayırım ministrlarnı otstavkağa cibärüdän fayda buluda şiklänä. Bu xaqta ul jurnalistlarğa çärşämbe könne belderde.
8 fevral’ könne Qazannıñ xoquq yaqlaw üzägendä matbuğat oçraşuı uzdı. Anda Rusiäneñ 11 töbägendä, şul isäptän Tatarstanda da, 10 fevral’dän başlanaçaq ber aksiä turında bardı. 10 kön däwamında baraçaq älege çara qısalarında 12 xoquq yaqlaw oyışması xoquq saqlaw organnarı tarafınnan zıyan kürgän keşelärgä yärdäm itü, alarğa mäxkämägä möräcäğät itü öçen buşlay konsul’tatsiälär biräçäk. Xäyer, matbuğat oçraşuında äytelgänçä, monnan tış yärdäm sorap däwlät xezmätkärläre, tabiplar häm uqıtuçılarnıñ xoquqsız, qanunsız ğämällärenä zıyan kürgän tatarstanlılar da möräcäğät itä alaçaq.
Gölnaz İlgizär
