Accessibility links

якшәмбе, 11 декабрь 2016, Казан вакыты 09:17

Mäxäbbät häm näfrät cinayätkä kitergän


Ğaşiqlar köne, 14 fevral’gä böten dönya äzerlängän waqıtta, kibetlär mäxäbbät süzläre yazılğan täbriklämälär, mendärlär, uyınçılar, känfitlär belän tulı bulğan bu waqıtta, ber Qazan yegetenä Ğasiqlar köne şatlıq kitermäskä mömkin. Şuşı könnärdä tikşerüçelär yanına kilep, ul, elek yörgän qızım mine taladı, dip şikäyät itkän bulğan. Bu xaqta çärşämbe könne Qazan gäzitläre yazıp çıqtı. Xällär bolay bula. Ber yeget belän qız, Qazan uramnarında tanışalar, ber bersen oşatıp, daimi oçraşa başlıylar. Küpmeder waqıt ütkännän soñ, yeget qızğa ğaşiq bula, aña kiügä çığarğa täqdim yasaw teläge belän yöri. Ämma tuy bulmıy qala, yäşlär räsmi töstä öyläneşkängä qädär bergä yäşäp qararğa bulalar. Urtaq xucalıq alıp bara başlağaç, qıznıñ naçar ğädäte buluı açıqlana. Tutaş narkotiklar belän mawıqqan bulğan. Annan soñ, yaña dozağa aqça citmägän waqıtta ul öydän äyber urlap sata torğan bulğan. Şulay itep, yäş xatın yeget fatirındağı televizornı lombardqa iltep küpmeder açqa yünätkän. Televizornı yeget lombardtan alıp qaytqan. Qız tağın berniçä tapqır televizornı şulay lombardqa iltkännän soñ da, yeget oy cihazın kire alıp qayta torğan bulğan. Bulaçaq xatınnıñ üzen şulay totuı, ir atnı aynıtıp cibärä häm ul öylänü telägennän kire qayta. Qıznı öyennän quyıp çığara. Käläş kitä, ämma anıñ küñeldä räncü qala. Yeget eştä bulğan waqıtta, ul, elek yäşägän fatirğa kilä, ämma işektän kerä almıy. Çönki yozaq alıştırılğan bula. Şul waqıtta ul, yort işege östenä menä, 2nçe qattağı täräzägä ürelä, pıyalasın wata häm fatirğa kerä. Bu yulı ul televizornı ğına tügel yaña DVD pleyernı da alıp çığa. Yeget öyenä qayta, yuğalğan äyberlärne kürä häm barısın da añlıy. Şunnan soñ, tişkereçelär cinayät eşen aça. Urlawçı qız şuşı atnada başında totılğan, äyberlär tanış lombardta tabılğan. Bu qısanı jurnalistlarğa tikşerüçelär üzläre söylägän. Qız häm yegetneñ bu mä’sälädä närsä uylağanın belep bulmıy, çönki alar kiñ cämäğätçelekkä tanılırğa telämi. Andıy kriminal waqiğalar kön sayın diärlek bulıp tora. Militsiä xäbärläre saytında yaña cinayätlär eşläre turında yaña mäğlümatlar çığıp tora. Mäsälän fevral ayı başlanğan şuşı 10 kön eçendä, berniçä keşeneñ ber-ber bersenä pıçaq belän qadaw, käräzle telefonnar, öy cihazları, maşinalar urlaw, narkotik satu oçraqları terkälgän.

Ütkän 2004 yıl näticälärenä qarağanda Tatarstanda barlıq cinayätlär sanı, 2003 yıl belän çağıştırğanda 5 meñgä artqan. Ä ayıruça awır cinayätlär sanı, 3 meñgä genä bulsa da kimegän. Qazannıñ 1000 yıllığına bağışlanğan 2005 yıl cinayätçelek yağınnan nindi bulır, älegä belep bulmıy.



Bikä Timerova.

.

XS
SM
MD
LG